Boronzu Big Band va presentar el so proyectu musical esti sábadu 24 d’ochobre, a les 19:30 hores, nel Palaciu de Revillaxixéu de Xixón, nun conciertu organizáu nel marcu de les Xornaes Musicales de la Banda de Gaites Villa de Xixón. La actuación, con entrada llibre hasta completar l’aforu, va marcar l’estrenu públicu d’una iniciativa que busca xuntar la música y el baille tradicional asturianu coles posibilidaes sonores d’una big band de jazz.
La propuesta parte de melodíes y pieces interpretaes tradicionalmente con gaita, tambor y otres formaciones del folclore asturianu, a les que la formación incorpora arreglos orixinales adaptaos al llinguaxe orquestal del jazz. El repertoriu combina xotes, muñeires y agarraos con espacios pa la improvisación y composiciones nueves, amás de dellos guiños al xéneru de la tonada. D’esta manera, Boronzu plantega una reinterpretación contemporánea del patrimoniu musical asturianu al traviés d’una formación instrumental amplia.
«Los 25 músicos que vamos actuar nel Palaciu esperamos que’l conciertu sirva pa compartir col públicu lo que ye’l proyectu y abrir una nueva etapa, na que queremos siguir ampliando’l repertoriu y trabayando con músicos y arreglistes de distintos llugares», esplica la banda. La actuación va cuntar amás cola participación de Loreto Suárez y Luis Ángel Fernández, que, amás de baillar, van exercer como maestros de ceremonia durante la tarde.
La elección del Palaciu de Revillaxixéu surdió d’una propuesta de la Banda de Gaites Villa de Xixón, organizadora del conciertu dientro de les sos Xornaes Musicales. «La propia banda propúnxonos facer el conciertu nel Palaciu, buscando un llugar especial pa un eventu d’esti tipu, y la propuesta encantónos», señala Boronzu, que ve nesta presentación una oportunidá pa dar a conocer el proyectu y avanzar nel so desenvolvimientu artísticu.
Amás de les actuaciones en directo, la iniciativa busca facilitar que los arreglos puedan utilizase n’otros ámbitos musicales y educativos. La formación anuncia que va estrenar próximamente una web na que van tar disponibles pa descarga llibre los arreglos de los sos temes, cola intención de que puedan incorporase a los repertorios d’otres agrupaciones. «Nun habría nada que nos prestara más que ver a escueles de música multidisciplinares, especialmente aquellos onde s’imparte gaita, incorporar estos arreglos a los sos conciertos», afirmen. La distribución abierta de los materiales forma parte d’un proyectu que combina investigación, creación musical y difusión del patrimoniu asturianu.
La formación ta integrada por 25 músicos con presencia de saxofones, trompetes, trombones, pianu, contrabaxu y batería, amás de gaita, panderu y voz. Boronzu aspira asina a construyir un repertoriu propiu que lleve la música tradicional asturiana a nuevos formatos orquestales, anque la banda reconoce que la dimensión de la formación fai difícil prever cuántos conciertos va poder ofrecer.
Suscríbite a les nuestres novedaes
