Hai una selmana estrenóse en directo Boronzu, una big band asturiana qu’esplora l’alcuentru ente la música tradicional asturiana, el baille y el jazz contemporáneu. Too ello con una sección de vientos y base rítmica cola presencia de la gaita y el tambor asturianu. Tres del éxitu de la so primer puesta n’escena , la formación llanza agora dos novedaes más: un videu resume del conciertu nel Palaciu Revillagigedo y el so primer single en toles plataformes musicales: ‘Xota de Vaḷḷebréu’.
«A la hora d’escoyer repertoriu ficimos una llista de temes que munchos grupos de baille tuvieren en cartera. D’esa primera escoyeta garramos los que tuvieren mas xugu a la hora de repartir voces ente tolos instrumentos. Queríamos que’l primer tema fuera una xota, y de les xotes, esta foi la que quedamos más contentos col arreglu», desplica Carlos Casado, cabezaleru del proyectu, al rodiu esti single.
‘Xota de Vaḷḷebréu’ grabóse nos Tutu Estudios de Corvera cola producción de Sergio Rodríguez y, anque enriba l’escenariu la big band axunta a 25 músicos, na grabación participaron nueve; dalgunos provenientes de formaciones de renome como Dixebra, La Bonturné, Pauline en la Playa o Slum Suit: Eva D. Toca (batería), David Casillas (contrabaxu), Xaime Arias (pianu), Aitor Herrero (trompetes), Alberto Castelló (trombones), Eladio Diaz (saxos), Carlos Casado (saxos), José Luis García (gaita) y Aida Suárez (pandereta). Casado valora’l procesu como «mui bien y rápidu», sorrayando que «el primer tema d’una banda ye’l más complicáu, porque hai que definir el soníu» y afirmando que quedaron «encantaos» col trabayu de Sergio «Tutu».
La composición engalánase con una portada cuidada diseñada pola artista xixonesa Begmont: «Queríemos ilustración con ún de los ingredientes del boronzu, la berza. Lo demás foi idea suya», comenta’l saxofonista añadiendo amás que próximamente van asoleyar los otros dos temes que grabaron y qu’estos tamién van llevar los diseños de Begmont: «hai qu’esperar para siguir la historia del señor berza y la pita«.
Pa completar toa esta xera, Boronzu busca facilitar que los arreglos puedan utilizase n’otros ámbitos musicales y educativos y, nesi sen, la formación estrenó estos díes una web na que tán disponibles pa descarga llibre los arreglos de los sos temes, cola intención de que puedan incorporase a los repertorios d’otres agrupaciones. «Nun habría nada que nos prestara más que ver a escueles de música multidisciplinares, especialmente aquellos onde s’imparte gaita, incorporar estos arreglos a los sos conciertos», afirmen.
Cola resaca del estrenu nel Palaciu Revillagigedo‘l sábadu pasáu, Carlos Casado fai agora una valoración mui positiva que-y da puxu a la big band pa siguir dando pasos: «Quedamos encantaos. Más de 150 persones pa una banda nueva ye dalgo de lo que podemos tar arguyosos. Nel conciertu presentación amás de temes de baile con Luis Angel Santos y Loreto Suárez al frente, ficimos canciones más de big band, bandina, pareya tradicional, y tonada, asi que pensamos que la xente pasó un ratin agradable nun conciertu dinámicu». Nel videu resume, pue vese daqué de lo que foi esa tarde tan especial.
Asina ye como esta formación integrada por 25 músicos con presencia de saxofones, trompetes, trombones, pianu, contrabaxu y batería, amás de gaita, panderu y voz, sigue construyendo un repertoriu propiu que lleva la música tradicional asturiana a formatos nuevos orquestales. Anque la banda reconoce que la dimensión de la formación fai difícil prever cuántos conciertos va poder ofrecer, con esti material audiovisual pue sentise y vese lo qu’amuesa esta formación que combina xotes, muñeires y agarraos con espacios pa la improvisación y composiciones nueves, amás de dellos guiños al xéneru de la tonada. A la fin, una reinterpretación contemporánea del patrimoniu musical asturianu al traviés d’una formación instrumental amplia.
Suscríbite a les nuestres novedaes
