La Fundación Belenos va dedicar el XXVI Seminariu d’Estudios Asturianos a la indumentaria tradicional, baxo’l títulu ‘La indumentaria tradicional: ente la fidelidá etnográfica y la modernidá’. La cita va celebrase los díes 14 y 15 de payares en La Puela d’Ayande, conceyu que vien acoyendo estes xornaes dende l’añu 2000, col oxetivu de fomentar l’estudiu, la conservación y la difusión del patrimoniu cultural asturianu.
El programa va axuntar especialistas n’historia, antropología, artesanía testil y diseñu pa tratar distintos aspectos del vistir tradicional, dende les sos formes históriques y los procesos artesanales hasta los mitos qu’arrodien al traxe y la so evolución contemporánea. La programación va tener tamién un espaciu pa la música tradicional col filandón previstu pa les 11:00 de la nueche del sábadu nel Hotel Restaurante Lozano. Esta celebración, que forma parte de la dimensión festiva y participativa del seminariu, va combinar la música del país cola xunta alredor de la cultura popular, nuna temática na que la indumentaria tien una presencia destacada dientro de la tradición musical y de baille asturiana.
La matrícula tien un preciu de 45 euros, con una opción de 130 euros que suma l’agospiu en réxime de pensión completa en La Nueva Allandesa, dende la comida del sábadu hasta la del domingu. Les places son llimitaes y el plazu d’inscripción acaba’l vienres 6 de payares. Pa formalizar la participación, la organización facilita’l teléfonu y WhatsApp 680 114 090.
Suscríbite a les nuestres novedaes
