El sábadu 15 y domingu 16 de payares la Fundación Belenos entama una edición nueva del Seminariu d’Estudios Asturianos, el llugar va ser l’avezáu: la Casa de Cultura de La Puela, capital del conceyu d’Ayande. Les inscripciones tán abiertes hasta esti 8 de payares y nesta ocasión, l’eventu va centrase monográficamente nel conceyu que los lleva acoyendo dende hai venticinco años. Nesti sen, van ufiertase conferencies sobre’l castru de San Chuis, sobre’l conocíu como estilu Ayande na construcción d’horros o sobre los mitos y lleendes recoyíos nesi conceyu, impartíos por especialistes neses materies como l’arqueólogu Ángel Villa Valdés, el director del Muséu del Pueblu d’Asturies Juaco López o l’etnógrafu Alberto Álvarez Peña.
Específicamente sobre’l campu musical va facese dos actos. Primero, una muestra de la música tradicional del conceyu d’Ayande, impartida por Xosé Ambás y Ramsés Ilesies, que van tar acompañaos polos músicos Dolfu Fernández (vigulín) y Diego Pangua (flauta); va ser a les 12:30 hores del sábadu. Otra manera, el domingu, a les 11:00 hores va facese un homenaxe al históricu grupu Aires del Palo, cola presencia d’ún de los sos integrantes, Manolo Rodríguez González, conocíu pol nomatu d’El Muni (acordionista).
Esta bandina son toa una institución musical nel suroccidente del país, fundada hai delles décades y mui popular en toa aquella zona. Caracterizábase por entemecer nel so repertoriu tanto pieces de la tradición como otres provenientes de la música pop de cada momentu; con elles fixeron baillar a delles xeneraciones, percorriendo les fiestes y romeríes. Nel añu 2006, la mesma Fundación Belenos, al traviés del sellu FonoAstur, publicaba un discu compilatoriu recoyendo grabaciones en vivo del 1º Ruxidoriu Ayandés na que’l grupu protagonista yera Aires del Palo. Nesti trabayu apaecen once pieces que faen honor a la filosofía de la bandina: interpretar baillables y entamar la folixa. Naquella ocasión, de la formación facíen parte: Manolo Rodríguez González «El Muni» (acordión), José Antonio Mon Berdasco «El Chingao» (acordión), Mario López Mesa (redoblante) y Laudelino Ramos Cordo «Lauden» (bombu y platos). A les persones que s’inscriban p’asistir al XXV Seminariu d’Estudios Asturianos va regaláse-yos un exemplar d’esti discu; la mesma puede facese nel teléfonu 680 114 090, teniendo un coste de 45 euros (125 si s’escueye la opción d’agospiu).
La Fundación Belenos lleva más de dos décades entamando esti alcuentru, siendo una de les principales actividaes alredor de la cultura asturiana de la seronda. En toos estos años tien tratao los temes más variaos y estremaos, tanto nel ámbitu material como inmaterial, tocando disciplines como la economía, la historia o la etnografía. Nel aspectu musical destaquen les xornaes dedicaes al celtismu musical asturianu (2019), publicándose posteriormente un llibru recoyendo les actes, nel que participen una docena d’autores; y el seminariu que tuvo como protagonista a la gaita (2024).
Suscríbite a les nuestres novedaes
