Hai unes selmanes PVXARRA publicaben en toles plataformes dixitales ÁBROME EN CANAL (LO QUE PASÓ DARRÉU VA ABLUCATE). Agora yá pue mercase tamién en CD na tienda online y física de musicasturiana.com y notros espacios que la banda anunció nun videu publicáu nel so Instagram. Nél, el tríu tamién fala del formatu digipack qu’inclúi pegatines y un póster doble y d’otros detalles que contién al más puru estilu duityurself del que fai gala la formación sierense.
ÁBROME EN CANAL (LO QUE PASÓ DARRÉU VA ABLUCATE) ye’l resultáu de les referencies comunes de los sos integrantes: la vida nos pueblos de Siero, la cultura d’internet, la televisión asturiana que consumieron de guah.es, tolo cutre y hortera, los memes, Vicente Díaz, la violencia policial contra la clase trabayadora, Death Grips, el punk y el DIY, la reconversión industrial, la yerba xorreciendo ente los adoquinos, los edificios esbarrumbaos y pueblos onde namás queda la espuma aislante ente les medianeres que, colos años, cría mugor y que protagoniza la portada del discu.
PVXARRA pon enriba la mesa la so manera d’entender l’Asturies presente. Una Asturies de la que naide quier marchar pero que, durante años nun lo punxo fácil. Una Asturies con creciente presencia de viviendes turístiques y inversiones extranxeres que destrúin el paisaxe. Una Asturies onde medra’l facismu. La so visión sincera y cruda de lo que ye ser mozu agora mesmu nel país (Ábrome en canal) contrastando col tiempu que vivimos, dominaos por internet y les redes sociales (lo que pasó darréu va ablucate).
Xunto a les inxusticies sociales, na pluma y tripa de Kosme, tamién hai llugar pa lletres más personales que falen d‘amor, desamor y la autopercepción d’ún mesmu mientres nos come’l ritmu del mundu modernu. Tamién alusiones a la naturaleza, escenariu imprescindible pa los trés integrantes; un discu dende’l pueblu. Cagamentos, ironía y amistá con xuegos de pallabres, PVXARRA suena como fala.
Tou esti mensaxe ta envueltu n’estilos musicales ensin llende nenguna: rap, punk, shoegaze, drum&bass, dubstep, muñeira, reggaeton, tonada… que deriva nun Glitch Folk, o cenciellamente, PVXARRA-CORE. Y que cunta coles collaboraciones de la cantadora d’asturianada Alicia Villanueva, Paula Surimi (Ice Haven), los gallegos Saibran (Boyanka Kostova) y Radio Cos y Desaniciu.
La parte gráfica tamién bebe d’esi PVXARRA-CORE, onde cualquier estímulu y referencia ye posible. Munches d’elles son de Gatu Prietu, fotógrafu de la cuenca del Nalón con una mirada única para retratar la tierra na que medró, qu’empastia a la perfección cola manera que tiene la banda de mirar l’Asturies presente. El 11 d’avientu van presentalo en directo nos Kuivi Almacenes d’Uviéu.
Suscríbite a les nuestres novedaes
