Siete años dempués de qu’asoleyaron el so primer trabayu, el grupu de baille tradicional Xeitu vuelve con un discu nuevu: Como l’agua nun pañuelu. L’álbum grabóse nos OVNI Estudio de Llanera, va salir a la venta previsiblemente’l próximu mes d’avientu y va presentase en directo’l sábadu 9 de xineru nel Teatru Filarmónica d’Uviéu nun eventu gratuitu nel que va haber «baille y folixa a esgaya, delles sorpreses y collaboraciones de persones coles que llevamos trabayando tola vida», como despliquen María Vázquez y Pau Santirso, responsables d’esta agrupación.
«Nesti discu siguimos cola mesma filosofía que nel primeru. Somos un grupu de baille tradicional y lo que buscamos ye dar a conocer los nuestros cantares, amosando la gran variedá de ritmos y bailles que podemos atopar na tradición asturiana», despliquen Vázquez y Santirso d’esti segundu álbum, sorrayando que nél va sentise «música tradicional de tol territoriu asturianu, dende l’oriente hasta l’occidente».
Otru de los pegoyos del discu ye’l calter divulgativu: «Somos conscientes de que Xeitu ye una fonte d’inspiración pa muncha xente y sabemos que’l nuestru trabayu sirve de referencia a otros grupos. Por eso, ún de los nuestros oxetivos principales ye siguir espardiendo y poniendo en valor la música tradicional d’Asturies». A esto añaden que la intención de la formación ye «siguir publicando materiales que puedan sirvir de ferramienta de trabayu nes escueles de baille y pandereta, pero tamién pa tola xente que quiera renovar o crear otru tipu de música partiendo d’una base tradicional».
«Na presentación que vamos facer nel Teatru Filarmónica van poder sentise tolos temes del discu. L’ATOAM (Archivu de la Tradición Oral d’Ambás), col trabayu de Xosé Ambás y Ramsés Ilesies, vuelve ser una pieza fundamental nesti proyeutu y, una vegada más, va tar presente nesi teatru que naguamos por volver a velu enllenu xente«, despliquen María Vázquez y Pau Santirso sobre la puesta n’escena del discu del 9 de xineru.
L’eventu va ser una de les primeres grandes cites de la música asturiana pal 2027 y va tener entrada llibre: «Xeitu queremos amosar el trabayu que facemos y compartilu con tol mundu. Ensin escaecer que la mayoría de les persones que formen parte del grupu son amateurs, nun queremos que naide quede ensin poder disfrutar d’esta presentación por motivos económicos.» «La tradición ye pa compartila y queremos que tol mundu pueda formar parte d’esta folixa», comenten los responsables del grupu baille que próximamente van siguir dando más novedaes al rodiu’l discu y el so conciertu de presentación.
Suscríbite a les nuestres novedaes
