Tres d’anunciar el mes pasáu que dexaben los escenarios, Mala Reputación yá punxeron fecha y llugar a los sos dos conciertos de despidida. Los Kuivi Almacenes d’Uviéu van acoyer el vienres 26 y sábadu 27 de payares de 2027 un adiós que va durar dos nueches. Ye asina porque les entraes pal sábadu 27 -única fecha prevista-, agotáronse en menos de 10 hores y por eso esta mítica banda rock va allargar la despidida col conciertu del vienres p’asina nun dexar a naide atrás. Les entraes pa esta segunda fecha yá tán a la venta.
En 1997 cuatro collacios de Cangues d’Onís xuntáronse pa crear un grupu de punk-rock nomáu Mala Reputación. D’entós pacá pasaron 29 años y esi mesmu grupu de cuatro collacios convirtióse nuna de les formaciones más veteranes y reconocíes a nivel estatal del rock fechu n’Asturies. Tres cuasi trés décades esta historia tien puntu y final colos dos últimos conciertos que van dar l’añu qu’entra. Mentanto, van tar toa esta temporada tocando en dellos festivales de tol Estáu.
Mala Reputación tienen 10 trabayos publicaos que destaquen pola so evolución y madurez; dende unos entamos más punk-rock, hasta facer anguaño un rock posáu, cuidáu y con muncha personalidá propia; esi carácter que fai d’esti cuartetu una formación única dientro de la escena rockera asturiana y estatal.
Anque canten mayoritariamente en castellanu, el grupu siempre amosó’l so compromisu cola llingua asturiana nes sos intervenciones públiques y en redes sociales. Dientro del so repertoriu n’asturianu destaquen himnos como ‘Sin Atadures’, ‘Raigaños’ o ‘Fálame’ y con ellos collaboraron músicos de la escena de música n’asturianu como Xune Elipe de Dixebra, Corquiéu o Skama la Rede.
Suscríbite a les nuestres novedaes
