Esti fin de selmana celebróse la séptima edición del Festival Internacional de Videoclips de Oviedo (FIVO), que dende hai unos años tien una sección dedicada esclusivamente a la producción del país, el Premio RTPA a mejor videoclip asturiano. La obra ganadora ye ‘tiempu !’, cantar de Ferla Megía al qu’Antonio Llaneza púnxo-y imáxenes. El xuráu destacó que «la so execución brillante, rigor técnicu y madurez estética conviértenla nuna obra merecedora del máximu reconocimientu».
«El xuráu da’l galardón a esta obra pola impecable articulación ente la so propuesta visual y narrativa musical, destacando la so escelencia técnica y artística na producción, la grabación y, sobre manera, nel tratamientu de la fotografía en blanco y negro. Sobresalen tamién el diseñu gráficu, inxeríu con coherencia dende los títulos iniciales hasta los creitos finales, la fuerza poética de les locaciones naturales —sobre manera la secuencia de la cueva— y la brillante transición visual qu’acompaña’l xiru de la composición a los sos pasaxes más enérxicos y electrónicos», argumentaron dende’l FIVO na concesión del premiu a ‘tiempu !’.
D’esta manera, Antonio Llaneza fáise otra vuelta cola máxima distinción del Premio RTPA a mejor videoclip asturiano, tres d’algamar tamién esti gallardón hai dos años col videoclip de ‘Valiente’ d’Héctor Braga. Nesta edición del FIVO, ente les 14 nominaciones, había cuatro de cantares interpretaos n’asturianu: Algaire, Ferla Megía, Compañeras y 6 Riales. A elles xuntábense otres trés d’artistes que canten davezu n’asturianu, ‘Un Mundo Feliz’ de Rodrigo Cuevas y realización de Jorge Rojas, ‘Los Asombros’ de Nacho Vegas y realización de Sofía Castañón -que tuvo la Mención Especial del Jurado Sección Asturias– y ‘El Hilo’ de Mala Reputación y realización d’Ignacio Cadenaba González.
500 euros, un diploma y la emisión del videoclip na RTPA y nes plataformes dixitales de la radiotelevisión pública; son los premios que concede’l Premio RTPA a mejor videoclip asturiano, un gallardón en collaboración col FIVO qu’apuesta por reconocer y dinamizar la producción audiovisual musical d’Asturies.
Suscríbite a les nuestres novedaes
