Son les 12:30 del xueves 5 de Payares cuando abro la puerta del estudiu. Ellí alcuentro a Vero, Ram y Pepín, con Olaya a los mandos, mientres Ambás, na pecera, graba les últimes estrofes del Enrame de San Xuan de Valmori. Por muncho que yá los pudiera esfrutar na so presentación na casa natal de Xovellanos va cosa d’un añu, siento daqué nuevo al llegar a aquel espaciu.
Dempués de dos o trés apuntes llingüísticos de Ramsés, Xose sal del cubículu pa cuntame más sobre les bases d’esti proyectu; una d’elles ye precisamente la llingua. Cada cantar ta interpretáu na variante na que foi fechu.
La sensibilidá y facilidá d’Ambás pa reproducir los cambios isoglóticos, xunto cola ayuda de «filólogos de guardia» como Balbuena o’l propiu conocimientu enciclopédicu de Ram, faen de Buír un proyectu que ye reflexu de la riqueza llingüística del nuesu país.
«Esti CD vien a rexistrar el repertoriu que yá lleva sonando nos ocho directos que Buír tien daos per toa Asturies, nun viaxe que-yos permitió, por exemplu, esplorar variaciones, formes nueves o atender a les reacciones del públicu»
Si bien el discu entá nun tien fecha nin carátula definitives, les sos canciones yá taben escoyíes dende va tiempu; según me cunta Ambás, esti CD vien a rexistrar el repertoriu que yá lleva sonando nos ocho directos que Buír tien daos per toa Asturies, nun viaxe que-yos permitió, por exemplu, esplorar variaciones, formes nueves o atender a les reacciones del públicu. Señálame tamién qu’amás de los doce temes fixos que toquen en cada conciertu, siempre faen un «guiñu xeográficu», interpretando un tema del llugar onde actúen: un aguilandu en Grau, una danza n’Ayer, el yá casi viral agarráu en Cangas o la Xiringüela del repertoriu de Mariyina de Congostinas, que va dir tamién nesti CD.
Da la una de la tarde cuando entamen a grabar un tema nuevu. Nesti cuartu día namás queden dos d’esos trece temes totales pa rematar la grabación. De primeres sorpréndeme qu’en cuatro díes pudieren grabar toles voces de toes estes melodíes, y ye cuando entamen a grabar cuando llego a entender por qué. Vero y Pepín entren nos dos espacios del estudiu y modelen a la vez y de siguío la primer parte del tema, ensin pauses nin duldes. Ram y yo, dende fuera, quedamos ablucaos coles maraviyes que salen d’aquella sala, mientres vemos avanzar el diagrama d’onda.
Prestame sobre manera entamar a entender un poquiñín nesi momentu la forma de trabayar de Vero, percibir cómo, ente beats y armoníes que-y atraviesen el cuerpu, sigue siendo quien a dexar baillar les manes al son de los trinos y les escales de Pepín. Pel otru llau, alcuéntrome a piques de rabiar pola inconformidá y la humildá coles que Pepe niega les fantasíes que vien de tocar y que toos tamos sintiendo, melodíes a les que nun llogro atopar puntu de meyora.
Son les dos y media y, como les coses importantes siempre se falaron comiendo, aprovecho la pausa pa xintar pa face-yos dalgunes preguntes sobre esti proyectu nuevu.
«Buír güel al pote, pero cuando ta fechu que güel distinto, a berza» y «a vaca, a corte»
Vamos poder sentir Buír, vamos velos nos conciertos y garrar el discu coles manes. Por eso aprovecho pa pregunta-yos daqué que namás ellos van poder saber: ¿a qué güel Buír?
Paez que Pepín tienlo bastante claro: «Buír güel al pote, pero cuando ta fechu que güel distinto, a berza» y «a vaca, a corte». Ye precisamente esi golor a vaca’l que nos lleva a otra de les bases del grupu: el vínculu especial col repertoriu. Falen precisamente nesi sen del cantar de muñir, ún de los primeros qu’iguaron pal grupu y del que Vero comenta: «Ye daqué tan cercano, que manca». Ambás recuérdame que nun ye lo mesmo vivir un repertoriu, como ellos faen, que sacalu d’un cancioneru; y lo importante que ye poner cara, voz, paisaxe… Ye por eso que dan siempre una atención especial a les presentaciones de los temes nos directos, a reconocer d’ónde vien cada cantar, daqué que resúmenme nuna frase: «son artistes y compositores, nun ye tradición de toes».
«Son artistes y compositores, nun ye tradición de toes»
«Faer esto caliéntame’l pechu»
Amás de Buír, conozo que tienen ente manes una montonera d’iniciatives, por eso plantego-yos: Nun teníeis falta d’entamar un proyectu asina, el tiempu ye llimitáu y andáis los trés a mil coses, ¿por qué entamar esto agora?
Caún tien equí la so perspectiva: «Facer esto caliéntame’l pechu», «préstame llevar lo tradicional a otros sitios», diz Vero. Xose, pela so parte, comenta que sentía la necesidá de siguir cantando, mientres Pepín ve en Buir la oportunidá de facer que la música tradicional seya tamién contemporánea, «como nós somos».
Ramsés y Ambás coinciden en que canten pa recordar el mundu del que salen estos cantares, un mundu que «ta na UVI» y desapaeciendo; pero «ensin mitificalu tampoco», apuntala Ram, qu’esi mundu rural tien tamién miseries y bondaes.
Pienso que facer un discu ye construyir con munches manes y munches histories, que quiciabes nun tendríen sentíu por si mesmes. Asina que aprovecho pa pregunta-yos: ¿Cómo se sostién sobre esti tayuelu lo que tais construyendo?
«Con infusiones de melisa y miel», cuenta Vero de primeres, mientres Pepe diz que ye a base de ceder y saber entender. «Con Buír choro, emocióname», diz Vero, y nesto toos lleguen a coincidir. Y yo, dende fuera, tamién pueo afirmar qu’esti sostén emocional nótase, y que la forma de remover que tien esti repertoriu nun sal d’otru sitiu que de la intensidá cola que son quien a vivir lo que tán tocando.
Nel tiempu que queda de la comida siguimos falando d’otres hestories: de cuánto hai de la hestoria propia na música que faen y de la importancia de Sergio TUTU en Camín de Cantares y na hestoria de la música asturiana.
Dan casi les cuatro y volvemos al estudiu. Mientres graben dalgunes de les otres partes, aprovecho pa dar un paséu con Vero y falar de la so perspectiva. Buír nun ye Tuenda y Tuenda coló con Elías, pero pienso que nun tien de ser fácil enfrentase a la solombra d’esti ciprés.
Vero cúntame, sicasí, lo bien que funciona’l grupu, lo fácil que-y resulta trabayar con ellos, aludiendo quiciabes a un calter asemeyáu del suroccidente o a la conexón de cosmovisiones, gustos clásicos y referentes varios que puede tener especialmente con Pepín. Nun negando «la pedrada de caún» y la necesidá de siempre escuchase. Vero cúntame tamién cómo entamó’l grupu, colos 33 temes que-y propunxeron Pepín y Ambás, cómo los trescribió y foi xugando con ellos hasta dir faciéndolos lo que son agora. Cúntame cómo esti xuegu y esti esfrute tán presentes en cada directu y cómo siguen apaeciendo nel estudiu grabación.
«Vero cuéntame cómo esti xuegu y esti esfrute tán presentes en cada directu y cómo siguen apaeciendo nel estudiu grabación»
Vero y yo tornamos pal estudiu xusto a tiempu pa esfrutar del momentu de grabación de Ram, que, anque nun tea oficialmente dientro de Buír, lleva poniendo, en dos sesiones de grabación, les percusiones de dellos temes. Yo torno a pensar, como tantes otres vegaes na discreción cola que Ram camina per esti mundu, siendo como ye un músicu y docente tan estraordinariu.
El panderu de Binita, un pianu de cola y una flauta impresa en 3D na mesma grabación de TUTU, ye Buír, ye tradición y mestura, ye «la nuesa vida nuna pista de CD».
Dexo l’estudiu poco primero de les 17:15, xusto cuando entamen a grabar les voces pa la so versión de la Xiringüela de Mariyina.
«El panderu de Binita, un pianu de cola y una flauta impresa en 3D na mesma grabación de TUTU, ye Buír, ye tradición y mestura, ye «la nuesa vida nuna pista de CD«»
*N. de l’A. Queda eiquí la mio deuda por nun saber reproducir esti testu na variante Occidental que bien merecía.
Suscríbite a les nuestres novedaes
