Trés violinos y una guitarra conformen Mediaoreya, un cuartetu de cuerda al que nun tamos nada avezaos. Los músicos mozos Irene Vioque (Xara) al vigulín, Celia Nieto (Corquiéu, Entós, Draque, La Ciudá nel Mar) al vigulín, Julio Rodríguez (Llan de Cubel, Draque, Loína) al vigulín y Pablo Fernández (Alienda, Rellume) a la guitarra estrenáronse cola formación Mediaoreya’l pasáu día 17 na Taberna El Cuévano (La Pola Siero), coincidiendo cola «previa» del Carmín 2026.
La complicidá que namái puede apurrir una bona amistá y la espontaneidá que da medrar a la llume de les jam sessions fueron los ingredientes clave pal estrenu d’esti nuevu grupu folk asturianu. Mediaoreya apostó por un repertoriu mestu de composiciones propies y pieces tradicionales, combinaes na clásica estructura del set, formada pola suma —de mou xeneral— de dos o trés melodíes. El grupu amosóse especialmente cómodu na interpretación de composiciones propies, pudiendo sentise sets con pieces compuestes por caún de los sos integrantes, con un interés especial pola esploración del dinamismu y la potencia rítmica del saltón.
La complicidá que namái puede apurrir una bona amistá y la espontaneidá que da medrar a la llume de les jam sessions fueron los ingredientes clave pal estrenu d’esti nuevu grupu folk asturianu
La resonancia xenerada polos trés violinos, llueñe de resultar repetitiva, como nun primer momentu podría pensase pola superposición de trés timbres asemeyaos, llevó a los asistentes per caminos bien distintos que discurrieron dende’l power folk hasta un folk más sele y progresivu.
Asina, surdieren referencies sóniques que bien podríen asociase a grupos como les estauxunidenses Scottish Fish nun primer set de saltones o a los xuegos armónicos de la banda folk danesa Stundom nun set de valses qu’incluyía clásicos de la tradición asturiana como ‘En un delicioso lago’. Esta variedá interpretativa tuvo especialmente garantizada pola potencia rítmica de les cuerdes de Pablo Fernández y pol usu d’octavadores y baxu pedal, sobre’l que los trés violinos pudieron desenvolver tol so potencial técnicu. La naturalidá y el dinamismu de Celia Nieto, la gran precisión interpretativa d’Irene Vioque y l’enorme capacidá d’esploración musical de Julio Rodríguez dialogaron a la perfección a lo llargo de tol conciertu, creando atmósferes y testures bien personales que, ensin dulda, van siguir desarrollándose con más hores de rodaxe.
La resonancia xenerada polos trés violinos, llueñe de resultar repetitiva, como nun primer momentu podría pensase pola superposición de trés timbres asemeyaos, llevó a los asistentes per caminos bien distintos, dende’l power folk hasta un folk más sele y progresivu
Pesie a los nervios y la tensión propios de cualquier primer actuación, los músicos consiguieron dexar espaciu pa la broma, la picardía y la cercanía col públicu, presentando caúna de les sos pieces de mou pormenorizáu. Nun faltaron tampoco los agradecimientos personales a otros músicos del panorama folkie, destacando especialmente los dedicaos al violinista Simon Bradley, compositor de dalgún de los temes interpretaos pol grupu, y a David Fernández, creador de la web Asturtrad.org y gran dinamizador del ecosistema de les sesiones folk.
Asina, ensin dexar de mentar y reconocer a quienes vinieron enantes qu’ellos, Mediaoreya paecen tar yá preparaos pa lliberase de la etiqueta, dacuando paternalista, de «relevu mozu» de naide y poder xestionar con llibertá lo que pa ellos quiera dicir «música tradicional asturiana».
Asina, ensin dexar de mentar y reconocer a quienes vinieron enantes qu’ellos, Mediaoreya paecen tar yá preparaos pa lliberase de la etiqueta, dacuando paternalista, de «relevu mozu de naide» y poder xestionar con llibertá lo que pa ellos quiera dicir música tradicional asturiana
Suscríbite a les nuestres novedaes
