El XII Filandón de Llaranes axunta conciertos, charres, alderiques, visites y presentaciones

Escontra'l Raigañu entama estes xornaes que van acoyer Tarde en Danza y otres cinco actividaes dende esti 21 de payares hasta'l 12 d'avientu

Escontra’l Raigañu nun apara y, tres de celebrar hai dos selmanes la XXIII Seronda d’Avilés, continúa coles sos actividaes pa da-y puxu a la cultura’l país. Esta selmana Llaranes acueye l’entamu del XII Filandón, unes xornaes que van allargase hasta’l 12 d’avientu y que nesta edición tán caracterizaes por axuntar tradición y vanguardia. D’esta manera va haber charres, alderiques, tarde en danza con amagüestu, visita guiada a l’Aula Didáutica de Cultura Popular Asturiana y la presentación del Bancu Soníos surdíu al rodiu’l Llaboratoriu de la Nueche en Danza.

La primer cita va ser esti sábadu 21 de payares, nel Centru Sociocultural de Llaranes. La xornada va entamar a les 19h con una charra-alderique titulada Raigañu y vanguardia. Esperiencies creatives nel sieglu XXI, na que va participar la ilustradora Nieves González. Llueu, a les 20.30h, hai Tarde en Danza col Grupu de pandereteres Escontra’l Raigañu y L.lueñe, tríu de música tradicional formáu polos pernomaos músicos Alba González (voz), David Varela (acordión) y Adrián Argüelles (flauta). La xornada complétase con un amagüestu con sidra’l duernu, castañes magostaes y fritos de calabaza.

La programación va siguir los díes 26 de payares y 1 d’avientu, con una visita al Aula Didáctica de Cultura Popular Asturiana, asitiada na Plaza Mayor. L’actividá, prevista pa les siete la tarde, va llevar por títulu Formes de vestir, maneres de vivir y va permitir averase a distintos aspectos de la indumentaria y les formes de vida tradicionales asturianes.

Bancu Soníos

La cabera xornada del XII Filandón va ser el sábadu 12 d’avientu, nuevamente nel Centru Sociocultural de Llaranes. A les 18.30h va celebrase un alderique col títulu Por qué un llaboratoriu de la Nueche en Danza. De siguío, a les ocho la tarde, va tener llugar la presentación de Bancu Soníos -iniciativa surdida alredor d’esti llaboratoriu-, acompañada d’una pinchada entá por confirmar.

«Igual que naquellos tiempos nos que les muyeres s’axuntaben a filar y los mozos acudíen a armar folixa, güei, nel sieglu XXI, recoyemos esi espíritu pa convidavos al XII Filandón. Un alcuentru pa deprender sobre los nuesos usos y costumes dende una mirada actual. Va haber momentos pa aldericar, pero tamién pa baillar al son de la pandereta y l’acordión mientres coméis unes castañes amagostaes con sidra’l duernu», publicaron Escontra’l Raigañu nes sos redes sociales pa convidar al públicu a participar nestes xornaes.

Llista d'espera Vamos informate cuando recibamos unidaes. Por favor déxanos embaxo una dirección válida de corréu electrónicu.