El colexu públicu El Cotayu de Carbayín, en Siero, cumplió’l cursu pasáu 50 años. Ente toles xeres qu’entamaron pa la so cellebración, ta la grabación d’un discu col alumnáu y profesoráu d’esi cursu, y tamién d’escolinos y escolines d’antaño. Baxo la dirección de la so maestra de llingua asturiana, Fani Moro, y la producción musical de Dani Álvarez, tán grabando 13 temes que percuerren la historia de la escuela.
Escritos dafechu n’asturianu, estos cantares usáronse a lo llargo los años nes actividaes complementaries, como’l magüestu o l’antroxu, y tamién se presentaron a dalgún concursu musical escolar. Musicalmente intenta abarcar dellos estilos musicales, con melodíes tradicionales y lletres nueves, composiciones o igües de temes perconocíos, magar que la mayor inspiración seya’l folk asturianu. Amás, a costafecha pa esti aniversariu escríbise la lletra “Soi de Carbayín”, que xunto a la melodía tradicional “Soi Ferreirín”, ye’l cantar qu’abre esti trabayu.
El discu va asoleyase a lo llargo l’iviernu d’esti cursu 2023/2024, col títulu 50 años xuntos, y la so presentación va ser en xunu de 2024. Ye una amuesa del potencial que tien la música, la educación y la normalización llingüística cuando se faen proyectos orixinales que van de la mano
Suscríbite a les nuestres novedaes
