L’Asturianada ye prestosa ye’l nome de la xornaes coles que l’Asociación d’Intérpretes de la Canción Asturiana (AICA) quier facer «un viaxe a la escencia de l’asturianada» na que va poder deprendese sobre la «hestoria, tradición y voces que caltienen viva» la forma más vieya de cantar n’Asturies. La iniciativa arranca esti vienres 29 en Bimenes y va pasar per un total de doce conceyos.
Dende les 18h la Casa Cultura de Santuyano acueye esta primer cita na que va haber una ponencia d’Iván Rionda, estudiosu del xéneru; participa la «lleenda viva» Mariluz Cristóbal Caunedo pa falar de vaqueires, asturianada y les vivencies que foi recoyendo nel so bayurosu camín; y llueu los cantadores Julio Mallada y Águeda Riera xunto al gaiteru Fonsu Les Regueres van facer un bloque formativu téoricu-prácticu pa resolver duldes, deprender tonada y descubrir cómo ye’l so acompañamientu cola gaita. Dende AICA despliquen que l’actu va rematar con un espaciu p’animar «a dar el pasu a cantar o acompañar a la gaita con orientación d’estos mayestros».
Precisamente, «conocer meyor esti xéneru, falar con intérpretes esperimentaos y descubrir que nun ye nada imposible y probar a cantar y acompañar cola gaita», son los oxetivos d’esta iniciativa que cunta col sofitu de la Conseyería de Cultura, Política Llingüística y Deporte. Les Regueres, Peñamellera Baxa, Tinéu, Colunga, Quirós, Cabranes, Eilao, Yermes y Tameza, Samartín d’Ozcos, Onís y Ayande, son los demás conceyos onde va desendolcase’l proyectu.
Semeya esbillada d’un videu de Gelín Santibanes.
Suscríbite a les nuestres novedaes
