L’Entregu acueye güei la primer edición del Día Institucional de l’Asturianada

A les 12h arranca nel Teatru Nuberu de L'Entregu esta cita que fai un reconocimientu a una de les espresiones más singulares de la cultura'l país

Noticies

La Conseyería de Cultura, Política Llingüística y Deporte celebra güei domingu, 4 d’ochobre, en L’Entregu, el Día Institucional de l’Asturianada, una cita que naz con vocación de continuidá pa reconocer una de les espresiones más singulares de la cultura tradicional asturiana y contribuyir a la so tresmisión ente xeneraciones. L’actividá cunta cola collaboración de l’Asociación d’Intérpretes de Canción Asturiana (AICA) y les asociaciones de canción asturiana del Narcea y del Nalón.

L’actu, que va tener llugar a les 12h nel Teatru Nuberu de L’Entregu y va ser conducíu por Esther Fonseca, va axuntar per una hora memoria, música y voces nueves. Les actuaciones van percorrer distintes formes de la tradición cantada, como molineres, cantares dialogaos, de siega y otros repertorios, interpretaes principalmente por neños y neñes.

El protagonismu de les voces infantiles reflexa’l sentíu de la xornada, que pretende recordar que l´asturianada, declarada bien d’interés cultural (BIC) de calter inmaterial en 2015, llegó hasta los nuesos díes gracies a quien la cantaron, deprendieron y tresmitieron. Nes sos lletres y melodíes permanecen formes de vida, trabayos, fiestes, efectos y cambios sociales que formen parte de la memoria común.

Homenaxe a Pieter Minden

Ún de los momentos centrales de la gala va ser l’homenaxe al musicólogu alemán Pieter Minden, fináu apocayá y venceyáu al estudiu de la canción asturiana. El so trabayu permitió afondar n’aspectos como les maneres musicales, los tipos melódicos, los estribillos, la interpretación y la relación ente la voz y la gaita.

Minden realizó una estancia investigadora n’Uviéu y presentó en 1995 na Universidá de Tübingen una tesis doctoral dedicada a la tonada. Aquel trabayu dio llugar a La tonada asturiana: un acercamientu musicolóxicu, publicáu en 2001 pol Real Institutu d’Estudios Asturianos (Ridea) y convertíu nuna referencia pal conocimientu del xéneru.

Con esti Día Institucional de l’Asturianada, el Gobiernu d’Asturies quier da-y a la canción tradicional un espaciu propiu y estable nel calendariu cultural. La celebración mira a quien la cantaron, caltuvieron y estudiaron mientres xeneraciones, pero tamién a quien entama agora a facela suya.