AICA (Asociación d’Intérpretes de la Canción Asturiana) continúa cola so intensa actividá pa esparder l’asturianada per tol país. Esti fin de selmana va participar en cuatro cites que combinen actuaciones y talleres formativos, que se celebren en San Tiso d’Abres, Xixón y Villaviciosa, y nes que participen tanto la so estaya moza como cantadores y gaiteros veteranos.
La primer de les actividaes va ser esti 5 de setiembre en Villaviciosa dientro del XIX Festival Internacional del a Gaita (FIG). Ellí’l gaiteru Rodrigo Joglar y la cantadora Lorena Corripio van poner el taller Acompañamientu de Canción Asturiana, nel que van amosar una de les técniques más importantes dientro de la tradición asturiana. La clase va desendolcase de 10.30h a 12.30h nel Atenéu Obreru de Villaviciosa y tien un preciu de 20 euros en conceptu de matrícula.
La segunda ye tamién el sábadu, a les 12.30h, en Xixón. Ellí la estaya moza d’AICA participa nel IV Festival «La Folixina» qu’entama la sección de Coros y Danzas del Real Grupo de Cultura Covadonga. Van dar un taller pequeñu alredor l’asturianada y facer una actuación p’amosar qu’esti xéneru tien cantera y futuru.
Les actividaes continúen el domingu 6 en San Tiso d’Abres, dientro de los actos qu’entama’l gobiernu asturianu pol Día d’Asturies y nos qu’actúen a les 13h dellos cantadores y un gaiteru por confirmar nel Área Recreativa d’O Piñeiro. Por último, AICA tamién collabora col FIG nel VII Certame de Canción Asturiana que se celebra en Villaviciosa’l domingu 6 a les 18.30 y nos qu’actúen na estaya moza Julia Gallego (6 años), Mario González (11 años), Bárbara Riesco (13 años), Jairo Pérez (14 años), Néstor Díaz (15 años) y Marina Carbajosa (18 años) -estos dos últimos, ganadores del Premiu Obdulia Álvarez «La Busdonga» d’Asturianada). Na categoría adulta participen Águeda Riera (Villaviciosa), Jorge Tuya (Villaviciosa), Claudia Abad (Llanes), Sergio Menéndez (Xixón). El gaiteru oficial ye Valentín Fuente.
Na semeya Marina Carbajosa y Diego Fernández.
Suscríbite a les nuestres novedaes
