Alan Stivell publica la so autobiografía, na que fai un repasu pela Música Celta y la historia recién de Bretaña
El músicu bretón ta acabante de publicar la so autobiografía col títulu de Stivell par Alan. Une vie, la Bretagne, la musique/Ur Vuhez, Breizh, ar Sonerezh (Éditions Ouest-France); yá enantes dellos autores escribieren sobre esta figura considerada’l padre de la Música Celta contemporánea, ye’l casu de Laurent Bourdelas con Alan Stivell (2012) o de Jacques Erwan y Marc Legras con Alan Stivell. Racines interdites/Gwriziad difennet (2020), nel Estáu español ta publicada en castellanu Alan Stivell (1981) del periodista musical Álvaro Feito. Sicasí, esta ye la primer vez que’l propiu cantante y multiinstrumentista cuenta la so vida, carrera, filosofía, pensamientu políticu y esperiencies en primer persona.
Al traviés de les sos páxines podemos conocer cómo dende unos posicionamientos políticos cercanos al marxismu foi pasando a una visión de tipu más humanista y menos ideolóxica, anque ensin arrenunciar al derechu de tolos pueblos del mundu al so desenvolvimientu políticu, llingüísticu y cultural. Según el propiu Stivell: «Nesti llibru trátase de Bretaña, de la música, de los mios seres queríos, del mundu: en resume, ¡de tola mio vida!». Cola so llectura vamos (re)descubrir a esti músicu imprescindible gracies a les semeyes y los archivos personales inéditos qu’agora s’asoleyen, amás d’un testu escritu dende la sinceridá más absoluta.
La esperiencia vital de Stivell -que tuvo en dos ocasiones n’Asturies– abarca aspectos como la música, la poesía, la historia, la escritura, la política o l’activismu llingüísticu y cultural. D’estes últimes facetes l’autor comenta: «La música ocupaba la mayor parte del mio tiempu, pero fui consciente, dende’l principiu, de la política que podía tener. Anécdota activista: eso nun m’impidió pasar nueches peles carreteres o en cais pintando conseñes. Almito qu’oyer llegar a la xendarmería; glayá-y a la persona emocional qu’hai en min: “¡Muéstrate o disparo!” ye inolvidable».
Stivell yá publicara enantes obres como Telenn la Harpe Bretonne (2008), Tri Martolod (2012) o Sur la route des plus belles légendes celtes (2018). Agora, decídese a escribir sobre si mesmu nesti nuevu llibru que contién más de doscientes semeyes y archivos atropaos pol fotógrafu Yvon Boëlle y de colecciones personales inédites del músicu. Un testu nel que reflexona sobre la música bretona y celta en xeneral, sobre Bretaña y sobre la so visión del mundu.
