Algaire llancen el videoclip de ‘Rondó FEM’

Coincidiendo col 8 de marzu, Día Internacional de la Muyer, el cuarteru folk Algaire asoleya’l videoclip de “Rondó FEM“, cantar que forma parte del so primer discu ‘Coral y Maera’. Esta canción feminista con lletra de la escritora mierense Laura Marcos reivindica’l llabor invisible de les muyeres y critica la desigualdá. Toles imáxenes foron grabaes en Mieres -conceyu d’onde ye’l grupu-, y la realización audiovisual ye de Néstor Fernández de Báltico Producciones.

Algaire naz nel branu de 2019 tres de la participación de les sos integrantes nel Festival Interceltique de Lorient con delles agrupaciones. Formáu poles pandereteres Iratxe Espina, Carla Miranda y Loreto Suárez, y el guitarrista Juan Yagüe, Algaire ufre un repertoriu variáu de música tradicional del norte de la península, amás d’igües de temes con lletres reivindicatives.

‘Coral y Maera‘, ye’l so primer discu. Formáu por 12 cantares, Algaire parten de y caltenienen como base la música tradicional asturiana, pero buscando sonoridaes actuales y amiestos colos que poder llegar a un públicu que nun seya cercanu a esta. D’esti mou introducen arreglos que miren pa la música electrónica, pop, llatina y hasta la urbana.

Compra’l discu na tienda online y siéntilu nes plataformes dixitales