Cuatro artistes venceyaos a la música n’asturianu lleven premios nos AMAS 2022

El vienres 5 de marzu cellebróse nel Teatru Filarmónica d’Uviéu la gala d’entrega de la Premios AMAS 2022. Nella recibieron premios cuatro nomes que tienen rellación cola escena de la música n’asturianu y gallego-asturianu: Banda de Gaitas El Trasno na estaya de Gaita; Banda Gaites Camín de Fierro premiu a Mejor Canción Folk por “Flacos y Ensin Peinar”, Luis Senén -músicu de Rubén Alba, responsable de los estudios 15:40 y antiguu componente de Felpeyu, ente otros proyectos- foi escoyíu como Mejor Batería, y Germán Mingote -productor de Xaime Martínez-, na estaya de Producción. El llistáu total de premiaos pue vese na web de los Premios AMAS.

Nesta edición 2022 taben nominaos dellos nomes venceyaos a la escena musical que se fai nes llingües autóctones d’Asturies. Na estaya de Mejor Disco Folk taben los grupos L-R con ‘N.O.S.’, Luis Núñez y Los Folganzanes con ‘Xanzaina‘ y Baxel con ‘El Cantar del Simpatías’. Na estaya de Mejor Canción Folk yeren Abéu con “Dame Tira“, Llevólu’l Sumiciu con “L.lamentu” y Fernando Valle Roso y Silvia Moreno con “Tengo un Vieyu en Casa“. Na estaya de Gaita, les bandes de gaites de Ribeseya, Xácara (Uviéu), y Güestia (L.lena). En cuantes a instrumentistes, taben nominaos Susana Gudin de Taranus na categoría de Voz; Eva Díaz Toca y Xaime Arias (de Slum Suit y otros proyectos de jazz de raigañu) nes estayes de Batería y Teclaos; y los lletristes Ruma Barbero de Felpeyu y d’otres bandes, amás d’Alicia Álvarez y Toli Morilla qu’amesten lletres n’asturianu con otres en castellanu. La llista complétase con la Canción de Música Urbana na que taben nominaos A Fesoria & Imanol Núñez con “Soi de Mieres“; Calea foi ún de candidatos a Artista Revelación; en Músicas de Cine foi escoyida la BSO de Fruela 757 pal curtiu-documental de Puru Remangu ‘Emburriando‘; mentes que’l videoclip de Bango “Raíces” fechu por Néstor Fernández ye parte de les nominaciones a Videoclip

Reivindicación na Gala

Na gala d’estos XVII Premios AMAS nun faltó la reivindicación per parte de dalgunos premiaos y presentadores. Nesti sen, el multiinstrumentista y musicólogu Héctor Braga entregó’l premiu na estaya de Gaita reivindicando’l papel y l’antigüedá d’esti instrumentu. Lo mesmo fixo Javi Tejedor, director de la Banda Gaitas El Trasno de Cuaña, que-y dio «un tirón d’oreyes» a la organización de los AMAS por nun facer que suene la gaita en nenguna de gala de los últimos años. El veteranu músicu tamién criticó la falta de sofitu institucional a la so formación. Por último Balbino Menéndez de Camín de Fierro sorrayó la crisis pela que ta pasando bandes como la suya por mor de l’ausencia d’actuaciones.

Mercar discos d’artistes nominaos a los premios AMAS 2022