Alicia Álvarez llanza’l videoclip de “El barquín”
A finales de 2020 salió a la cai Kikirikikí, el llibru-discu d’Alicia Álvarez (Pauline en la Playa, La Fabriquina) formáu por ocho cantares pa tola familia; con temes tienros y delicaos que falen de los sentimientos, les emociones o los mieos a traviés d’histories protagonizaes por animales, bichos, barquinos y otros personaxes. El trabayu ta siendo un éxitu de ventes y yá escosó la primer edición, por eso agora Alicia Álvarez celébralo publicando’l videoclip de “El barquín“, una de les pieces inédites que tien l’álbum.
«Cuando escribí “El barquín”, nun pensaba namás nos mieos de la reciella y como munches veces nos llimiten; inspiréme tamién nos escenarios de la mio propia infancia. Llevo tola vida viviendo n’El Muelle, crecí xugando nesi entornu, con esos barquinos que pasín a pasu foron convirtiéndose en veleros y otres embarcaciones, pero cuando yera guah.a, primero de la reforma del Puertu Deportivu, había sobre too llanchines de pescadores. Cuando imaxiné como sería esi barquín, medranosu, pensé nuna d’eses chalanes», desplica Alicia Álvarez sobre’l por qué d’esti cantar y videu nel que collabora David Varela -tamién curdionista nel cantar- y que ta realizáu por Cortexiphan Prods..
El procesu de grabación foi llargu. Tuvieron que cancelar dos vegaes por culpa del tiempu -«pa min yera importante que fuera un día de restallu»-, pero cuando se punxeron a ello, foi un prestor: «Dende’l Puertu Deportivu dexáronnos baxar a los pantalanes, metenos nes ramples… foi una maraviya poder cantar tan cerquina de la mar. Y llueu tuvimos la suerte de que Pablo Fernández, que tien amarráu’l so barcu Itsas Izar ellí, nos dexara grabalu navegando y tocando dientro». Una esperiencia «prestosísima» pa dar forma al primer videu d’Alicia Álvarez en solitario y una de les poques obres musicales audiovisuales qu’hai de música n’asturianu pa la reciella.
Carrera en solitario
Esta xixonesa lleva dende los 15 años tocando y componiendo. Undershakers, Pauline en la Playa, Bestiariu… son dalgunos de los proyectos nos que dexó la so buelga. Como Alicia Álvarez en solitario ta especializada en música pa la reciella que ye, a la par, pa tola familia. Publicó en 2016 el llibru-discu Pulgarina, pero foi col llanzamientu de Kikirikikí cuando afondó más nesti camín. «Cuando entamé a componer esti tipu de canciones siempre yeren pensaes pa Bestiariu, asina que nesi momentu paecióme más lóxico buscar un nome pa un proyectu col que presentales, Muga, pero col tiempu decatéme de qu’en realidá eses canciones nun yeren daqué puntual, sinon otru camín compositivu que nacia en mí, d’ehí que yá en Kikirikikí axuntare esos cantares con otros nuevos baxo’l mio nome», esclaria l’artista.
«Supongo y espero que sigan naciendo canciones nueves que poder compartir», comenta Álvarez sobre’l futuru de la so carrera en solitario. Amás, nun apara, y con La Fabriquina -el proyectu editorial que tien col so compañeru, David Guardado-, avanza que tán preparando un llanzamientu nuevu pa final d’añu. «Nun podemos adelantar nada porque, como siempre, préstanos el factor sorpresa, pero tamos seguros de que va gustar muncho», conclúi Alicia Álvarez, una de les persones claves pa que la reciella del país pueda medrar sintiendo y cantando música na llingua autóctona.
