Soto Rei acueye los Alcuentros de Música Tradicional n’alcordanza d’Aurelio Argel

Aurelio Argel (1963-2018) foi un periodista, críticu y dinamizador de la escena fundamental dientro de la música asturiana. Cuatro años dempués de la so muerte, la llocalidá onde nació acueye los Alcuentros de Música Tradicional, dos xornaes organizaes pola Banda Gaites Soto Rei. Nelles van actuar el vienres 3 de xunu la propia banda, José Manuel Tejedor y Dixebra; y el sábadu toquen Cadorna y, ente otres actividaes, va haber taller de baille con Pau Santirso y María Vázquez y llueu Nueche en Danza.

A les 22h del 3 de xunu entama’l Conciertu n’Alcordanza d’Aurelio Argel, un eventu nel qu’esti pueblu de La Ribera homenaxea a quien fuera ún de los periodistes más importantes pa la música de raigañu asturiana. Durante 25 años dirixó’l programa de Radio Asturias Música para raptar princesas, amás de participar n’otra montonera medios nos que siempre puxó por esta escena. Por eso nun ye casualidá que la banda gaites del so llugar de nacencia y dos formaciones como Dixebra y José Manuel Tejedor actúen na so alcordanza. Amás, tanto la veterana banda de rock astur como’l pernomáu gaiteru avilesín van presentar los sos nuevos trabayos: Ente la Niebla y Lluz.

Pal sábadu 4 el baille y la música más tradicional garren el protagonismu. A les 18h toquen Cadorna, banda folk formada por, ente otros, el multiinstrumentista Dani Álvarez y Luis Nicolás, actual guitarrista de Felpeyu. A les 20h, los bailladores de Xeitu Pau Santirso y María Vázquez van dar un taller de baille pa que llueu a les 21.30h nun quede naide ensin baillar na Nueche en Danza que se va facer, amenizada con una bandina tradicional . Carpa con chigre, DJs, una carrera y una xinta popular completen la programación d’un eventu qu’enllena La Ribera de música’l país n’alcordanza de quien fuera un pegoyu d’ella.