Avérase San Xuan y dalgunos conceyos van yá anunciando la programación pa festexar una nueche na que la música asturiana en directo tien davezu protagonismu. Na foguera de Corvera van actuar la Banda Gaites de Corvera, Guieldu y Caparines, mientres qu’en Llaviana‘l rock astur protagoniza esta festividá colos conciertos de Dixebra y Raigañu. Amás, nesta última villa tamién se celebra’l domingu 21 el IX Bandíname, cola participación de seis bandines de música tradicional.
L’Embalse de Tresona acueye otru añu más la nueche del martes 23 la Foguera de San Xuan de Corvera, declarada Fiesta d’Interés Turísticu d’Asturies. El programa de música asturiana arranca a les 22h con una actuación de la Banda Gaites de Corvera pel área festiva que va dar pasu, yá a les 22:15, al nomáu Conciertu a Belenos. Nél, va tocar el xoven grupu de folk celta Guieldu y la formación de música tradicional Caparines. La banda gaites va volver facer otru pase a les 23.30h acompañada d’unes pandereteres enantes de la quema de la foguera. Llueu de la medianueche hai verbena cola orquesta Tekila, un reflexu de cómo esti tipu de formaciones van ganando tarrén nes programaciones festives qu’enantes taben protagonizaes dafechu pola música’l país.
Per otru llau, na nueche de San Xuan de La Pola Llaviana van poner música en directo la formación más vieya y más nueva del rock astur. Dende les 20.30h el Quioscu Platillo de l’Avenida na Plaza Ayuntamientos Democráticos va acoyer los conciertos de Dixebra, el grupu decanu del rock astur y ún de los imprescindibles d’una nueche de San Xuan, y de Raigañu, banda d’agro-folk-rock que nació esti añu y que ta nesti momentu faciendo la xira presentación del so discu nuevu.
En Llaviana la programación de San Xuan va acullá de la foguera y dende l’Asociación de Autónomos de Llaviana (AULAV) -organizadora d’estos actos xunto a l’Ayuntamientu- anunciaron más actividaes dende’l 18 al 28 de xunu. Ente elles, alcuéntrase’l IX Bandíname, eventu nel qu’esti domingu 21 seis bandines van animar dellos llocales hosteleros faciendo trés rutes. Na primer d’elles toquen les bandines Cuatrolán y Les Campes; na segunda Los Asturianos y Urriellu; y na tercera Folkgaos y la bandina gaites Valle del Nalón.
Suscríbite a les nuestres novedaes
