Vuelve’l Derrame Rock quince años dempués de que marchara d’Asturies. Esti vienres 9 y sábadu 10 d’ochobre‘l festival va festexar el so trenta aniversariu volviendo a ún de los conceyos onde celebró dalgunes de les sos ediciones más mítiques: Llangréu. Los Talleres del Conde acueyen una cita gratuita na que la música n’asturianu va sonar colos conciertos de Dixebra, Escuela de Odio y Taragañu.
La mítica banda hardcore Escuela de Odio va ser la primera d’estes trés n’actuar. Toquen el vienres a les 22.55h y van dar un conciertu perespecial yá que supón la vuelta a los escenarios d’esta formación que tuvo qu’apartase d’ellos hai trés años polos problemes de salú del so cabezaleru, Pirri. Himnos como ‘Asturies Arde!!!’ o ‘Canciu de llucha’, son dalgunos de los temes n’asturianu que tien esti grupu llangreanu.
El sábadu 10 la xornada continúa a les 19.30h cola actuación de la banda street punk de recién formación Taragañu, qu’asoleyó apocayá’l so primer trabayu, Socialdemorata, qu’inclúi el tema n’asturianu ‘L’últimu bar’. La nueche zárrala Dixebra, la banda más mítica del rock astur con cuasi 40 años de trayectoria al costazu y un soníu que caleya pente’l rock, el punk, el ska, el reggae, el funk o’l folk.
El compromisu cola llingua asturiana y cola xusticia social define a estes trés formaciones que van compartir el cartelu del Derrame Rock con otres formaciones asturianes como La Morgue -que tamién tien un tema n’asturianu nel compilatoriu Engarradiella– y DJ Soulvatore di Groove -que nes sos sesiones tamién suena música’l país-, amás de con otros destacaos nomes del rock estatal como El Drogas y Boikot.
Suscríbite a les nuestres novedaes
