Yá ta en toles plataformes musicales Fueyes de color infinitu, el trabayu nuevu de Tierra y Eco, proyectu formáu pola escritora y música Ana Lamela y la multiinstrumentista Carla Miranda. Los seis cantares que formen l’EP «son una esbilla de los poemarios Conxura contra la decadencia y Na estación de los relevos y tamién un reflexu de los temes principales de la poesía de Xosé Bolado: la infancia, l’amor, el paisaxe, la perda y les firíes del tiempu», como desplica Ana Lamela, con quien falamos p’afondar más nesta obra.
¿Qué ye’l proyectu musical Tierra y Eco?
Tierra y Eco ye’l proyectu musical d’Ana Lamela y Carla Miranda onde la poesía y música, les pallabres y les notes texen un repertoriu nel que la nuesa llingua y la visibilidá de la poesía escrita n’Asturies tien muncho que dicir y contar. Pero, sobre too, ye la nuesa manera d’averar poemes y autores que nos gusten al públicu en xeneral.
¿Qué se pue sentir nesti discu en cuantes a música y lletres?
La nuesa intención ye que se sienta, al traviés de les melodíes, la poética de Xosé Bolado, poeta, críticu y activista cultural al que se-y dedicó la 44ª Selmana de les Lletres Asturianes, nel añu 2023.
Les lletres de los cantares son una esbilla de los poemarios Conxura contra la decadencia y Na estación de los relevos y tamién un reflexu de los temes principales de la poesía de Bolado: la infancia, l’amor, el paisaxe, la perda y les firíes del tiempu.
Nel tarrén musical, nun podemos falar d’un únicu estilu, porque ye un álbum mui eclécticu. Los temes adáutense al testu y a lo que nos tresmiten les pallabres de Bolado.
Como Tierra y Eco, la base de tolos cantares son la guitarra, el violonchelu y la voz. Pero nun podemos escaecer a los collaboradores que-y dieron el so toque personal a los temes. D’esta miente, alcontramos el llirismu del violín de Juan Diego Gómez; ritmos andinos de la mano de Diego Reyes, la flauta con aires folkies de Delia Gutiérrez Aranda, la orixinalidá de los baxos y el soníu del serruchu de Marino Amorrortu y los arreglos de guitarres y pianos del productor Germán Álvarez Mingote.
«Les lletres son un reflexu de los temes principales de la poesía de Bolado: la infancia, l’amor, el paisaxe, la perda y les firíes del tiempu»
¿Qué tal la acoyida?
Si falamos del proyectu Tierra y Eco en 2023 tocamos en varios llugares onde la xente disfrutó de les lletres y la música del nuesu repertoriu: León, Soria, Avilés, Uviéu, Xixón…
En cuantes a Fueyes de color infinitu, presentamos los cantares nel Muséu Nicanor Piñole en mayu de 2023 en formatu reducíu: guitarra, violonchelu y percusiones asturianes. Ellí vímonos arropaes por muncha xente del círculu lliterariu de Xosé Bolado, amigos y curiosos que pasaben per ellí. El resultáu nun pudo ser meyor y l’acoyida del públicu diónos el puxu que necesitábamos pa decidir espublizar esti recopilatoriu en plataformes musicales. Queremos que se sientan les pallabres de Bolado nes nueces voces y instrumentos.
¿El proyectu Tierra y Eco va tener más recorríu?
¡Por supuestu! Tenemos un repertoriu bayurosu y munches ganes de facelu sonar. Ponemos voz a lletres de munches autores asturianes como Marta Mori, Vanessa Gutiérrez, Ángeles Carbajal, Esperanza Medina… Además de temes orixinales d’Ana Lamela.
Suscríbite a les nuestres novedaes
