El Tiempo Delicuescente organiza el conciertu mañana, miércoles 17 de xineru, a les 20:30h nel espaciu El Refugio de La Salvaje, n’Uviéu. Les puertes abren dende les 20h y les entraes puen adquirise na taquilla a 12 €. La d’Antón Menchaca va ser la primer sesión de música n’asturianu programada dientro d’esti ciclu de Sesiones Delicuescentes qu’entemecen lo comunitario colo íntimo y cercano.
Belén Antón (voz) y Pedro Menchaca (guitarra) formen esti dúu d’asturianada, axuntando nes sos creaciones tradición y esperimentación. El pasáu mes de setiembre asoleyaron discu nuevu depués de 9 años, Los Díes Contaos, con un par de collaboraciones y un total d’ocho cantares -ente ellos, dos de collecha propia- nel que siguen desendolcando la so orixinal propuesta en temes como «El que me cortexa a mí», «Per debaxu del puente», «La siega» o «Anda y señálame un sitiu».
Antón Menchaca participó, amás, nel capítulu 25 d’Amosando, el ciclu de presentaciones de discos en formatu íntimu grabaos y retresmitíos per Internet qu’apoyamos dende musicasturiana.com. Los vídeos del conciertu y la entrevista tán disponibles na plataforma YouTube.
Suscríbite a les nuestres novedaes
