Va 40 años que la radio llibre xixonesa Radio Kras entamó a emitir nes ondes. Son yá cuatro décades de comunicación alternativa, crítica, con compromisu coles causes sociales y cola cultura y llingua asturiana. Caltener un proyectu colectivu d’esti calter tanto tiempu ye una xera abegosa y por eso hai muncho que celebrar en FestiKras, la fiesta de cumpleaños qu’entama la emisora’l sábadu 10 d’ochobre na sala Acapulco de Xixón y na que va haber una representación plural de la música n’asturianu.
L’axitador folclóricu Rodrigo Cuevas; la banda decana del rock astur Dixebra; la tonada renovada d’Antón Menchaca y el rap de Mostru l’Horru, van poner los cantares n’asturianu enriba l’escenariu. Tamién van tocar In Campo Aperto, Campeador, Herr Manos, Soulfriends, Lea Poldo es Leo Parda y Rafa Kas.
Asina ye como’l 10 d’ochobre, dende les 21.30h, la sala Acapulco de Xixón va acoyer esti festival que tien un preciu d’entrada de 5 euros y que va poder mercase nos llocales xixoneses La Revoltosa, Paradiso, Páramo Bar y Bar 4.70.
Suscríbite a les nuestres novedaes
