L’Ayuntamientu de Xixón sigue apostando pola música n’asturianu en delles de les sos programaciones culturales. Esti mes de xunu actúen José Manuel Tejedor y Dani Álvarez, Pipo Prendes, Antón Menchaca y Vérsica en Arte en el Barrio, un programa que lleva la música en vivo a los Centros Municipales Integraos de la ciudá. Amás esti fin de selmana ye la primer edición de la Feria de Plantas na que tamién hai música n’asturianu coles actuaciones de Vero Rubio y compañeras.
La programación d’Arte en el Barrio entama güei xueves 4 de xunu nel CMI Pumarín Xixón Sur col conciertu del dúu formáu pol prestixosu gaiteru José Manuel Tejedor y el multiinstrumentista Dani Álvarez. El xueves 11 de va ser el turnu de Pipo Prendes, que va actuar nel CMI El Llano, mientres qu’Antón Menchaca va llevar la so asturianada renovada al CMI Atenéu La Calzada el xueves 18 de xunu. La programación del mes zárrala’l grupu folk-rock-pop Vérsica, que toca’l xueves 25 de xunu nel CMI El Coto. Toles actuaciones son de baldre y son a les 19h.
Amás, l’axenda musical xixonesa d’esti mes de xunu va sumar otra cita nueva na qu’hai presencia d’artistes de la música n’asturianu. Ye la I Feria de Plantas del Xardín Botánicu Atlánticu, una xornada qu’esti 6 y 7 de xunu entemez naturaleza, divulgación y música en directo. Ellí van tocar esti sábadu a les 18.30h la multiinstrumentista Vero Rubio cola so propuesta de canción d’autora y el domingu 7 a la mesma hora ye’l turnu del grupu de música tradicional Compañeras.
Suscríbite a les nuestres novedaes
