La Banda Sonora de Tina Cuadriello

Tina Cuadriello (Avilés, 1970) ye musicóloga y historiadora del arte y tien el títulu d’Acordión pol Conservatoriu Superior de Música del Principáu d’Asturies. Tocó en Balandrán y Batulax y foi arreglista y directora vocal de Pandereteres de Fitoria. Na actualidá forma parte del grupu Gates Ximielgues, ye profesora de música en Secundaria y investiga na iconografía musical n’Asturies.

Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Un discu qu’enxamás canses de sentir.

En realidá son muchos, afortunadamente: los dos de Balandrán (que me paez que avieyen bien), el de les Pandereteres de Fitoria, dalgunos de Capercaillie, Cranberries, Amaral, Extremoduro, Dixebra, Eliseo Parra, Kiko Veneno, Ranarim… Mui ecléctico too.

Si tuvieres que formar parte d’otru proyectu musical, ¿cuál sería?

Igual de Tanxugueiras… o con Marisa Valle Roso.

«Si tuviera que formar parte d’otru proyectu musical prestaríame tocar con Tanxugueiras o con Marisa Valle Roso»

De los cantares que compusisti o interpretes, ¿cuál ye’l to preferíu?

Soi más arreglista que compositora, la verdá… Igual ‘La Cadena del Amor’, o ‘La añada de Feleches’, de les de Fitoria. Y del mi nuevu proyectu, Gates Ximielgues, ‘L.labasquinus’.

¿Cuándo foi la primer vez que xubisti a un escenariu y que pasó enantes, durante y depués?

Tenía unos ocho años… taba nerviosa, toqué decentemente, y llueu taba feliz… mio güelu ayudóme colos nervios (nun se pué contar cómo…)

¿Qué ye lo más inxusto de ser artista?

La mayoría de la xente piensa que namás faes lo que te ven facer enriba’l escenariu, ensin contar la pila d’hores qu’eches enantes de poder xubir. 

«Soi más arreglista que compositora… ‘La Cadena del Amor’, o ‘La añada de Feleches’, de Pandereteres de Fitoria y ‘L.labasquinus’ de Gates Ximielgues son dalgunos de los temes que más me presten»

Si fueres Conseyera de Cultura, ¿qué son les primeres coses que fadríes?

Plantegar un plan de verdá d’actividá cultural, pensando nes coses buenes qu’eso aportaría a la ciudadanía, per enriba de que suponga un entretenimientu. 

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Pues nun m’alcuerdo, pero taba enganchá a los programes de folk de Gente Joven (ta permitío reíse), prestábenme munchísimo…. Llueu vi una vez a Balandrán, de casualidá, y la siguiente casualidá foi que me propusieran tocar con ellos….

«Vi una vez a Balandrán, de casualidá, y la siguiente casualidá foi que me propusieran tocar con ellos….»

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Culposamente non; préstame la copla, les rancheres, la música latina pa bailar….

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ay, eso si que nun lo pueo cuntar…

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Dalguna novela de Sidoro Villa, de les del Teniente Corripio…