La cafetería cultural Toma 3 de Xixón ta acabante d’anunciar qu’esti branu van facer una programación musical cola que busquen reforzar el texíu cultural de la ciudá y siguir construyendo un espaciu vivu y independiente alredor de la música, la lliteratura y l’arte. Pa ello abren una convocatoria durante tol mes de xunu na que recibir propuestes pa programar.
La iniciativa diríxese a músicos y proyectos de dellos distintos estilos y formatos. Dende l’espaciu animen a participar a solistes, dúos, bandes, propuestes acústiques, esperimentales, folk, jazz, electrónica, música tradicional o poesía sonora. Según desplicaron al traviés de les sos redes sociales, dende’l Toma 3 quieren «sentir propuestes diverses» y ufir «un ambiente íntimu onde conectar col públicu«.
Dende’l llocal xixonés señalaron que, una vegada completáu’l formulariu de participación, van contactar personalmente coles propuestes escoyíes pa concretar feches, condiciones y detalles de les actuaciones. Con esta iniciativa, Toma 3 suma una nueva propuesta cultural al calendariu musical xixonés d’esti branu, apostando pola diversidá artística y pola creación d’espacios alternativos pa la música en directo.
Suscríbite a les nuestres novedaes
