“Soi” ye’l segundu adelantu del discu nuevu de Dixebra

Yá ta en toles plataformes dixitales “Soi“, el segundu adelantu del discu nuevu de Dixebra. Dempués del llanzamientu d”Ente la niebla“, esti cantar ye’l segundu de los dos adelantos qu’hai previstos qu’asoleyen enantes de la publicación d’esti llibru-CD el próximu 22 d’abril. El trabayu yá pue acutase en musicasturiana.com pa que quien lu merque lu reciba na so dirección el mesmu día del llanzamientu. Amás, mentanto dure la preventa hai merchandising de Dixebra a preciu rebaxáu y tolos pidíos van llevar de regalu una postal con testu manuscritu y van entrar nel sortéu d’una botella de sidra dedicada pol grupu.

“Soi” ye un cantar mui directu y rockeru, con protagonismu de les guitarres eléctriques, una parte folk-rock y una lletra enllena d’emotividá. El testu qu’acompaña a esti cantar nel llibru amuesa perbién el significáu: «Somos nós y les nuestres circunstancies, el productu del tiempu que nos tocó vivir y del que-yos tocó a los y les que nos precedieron. Ensin el carbón de los valles nun seríemos lo que somos, ensin la emigración, ensin les épiques del movimientu obreru. La recuperación de la memoria histórica vien a recordanos que tolo que tenemos y de lo que disfrutamos -la lluz, la niebla y la escuridá- son lo que la llucha de contrarios, los nuestros éxitos y fracasos y les propies contradicciones fixeron de nós».

‘Ente la niebla’, va ser la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nesti llibru-CD collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.

Acutar ‘Ente la niebla’ en musicasturiana.com