Los coleccionistes y amantes de la música folk y celta tán de norabona. El grupu Beleño ta acabante d’asoleyar una ufierta del vinilu orixinal d’Ofiusa (publicáu y fabricáu en 1987) xunto al últimu trabayu de la formación, Daón. Hai 30 unidaes disponibles, tán a la venta en musicasturiana.com por un preciu de 40 € y namás ye posible mercar el LP dientro d’esti pack. Con esti llanzamientu, Beleño siguen dando novedaes esti 2024 tres d’anunciar el so regresu dempués de 35 años d’inactividá y publicar el pasáu xunu el so tercer álbum Daón.
Ofiusa ye un discu de cultu dientro de la música asturiana. Ta formáu por un total d’ocho pieces: cuatro na Cara A -«El Xarreru», «D’una misguina’l to xeitu», «Danza de sigüencu» y «La Dixebra»-, y otres cuatro na Cara B -«Nuna fonte una xana», «Marcha nupcial», «Montesinos» y «A la gueta»-; nes qu’hai tanto temes instrumentales como de composición propia -principalmente fechos por Fernando Largo y Javier Cervero-. La formación que grabó esti trabayu colos técnicos de soníu Pedro Bastarrica y René de Coupeaud foron Javier Cervero (teclaos, zanfona, flauta), J. Roxu (vigulín), Xuan Prado (gaita, tin whistle, flauta dulce), Frankie (bouzuki, curdión diatónica, bodhram) y Tina (teclaos, guitarra acústica y baxu). Tamién hubo collaboraciones d’Isabel Muñiz y Herminia Álvarez a les voces; de Rafa Kas a la guitarra; y d’Emilio El Torneru al tambor. El diseñu foi obra d’Astur Paredes y la producción de Luis Delgado. Con él, daben un pasu más nel camín aniciáu en 1985 con Na ca’l fuau.
Amás d’esti trabayu históricu -del que namás quedan disponibles nel so formatu orixinal estos 30 LPs que tán disponibles na tienda online de musicasturiana.com-, la ufierta inclúi Daón, el regresu discográficu d’esta formación dempués de 37 años. Nel hai siete cantares qu’amesten lletres tradicionales con otres de nueva creación escrites polos poetes asturianos Ignaciu Llope, Teresa Lorences y Xosé Miguel Suárez -qu’escribe un cantar en gallego-asturianu-. Hai romances, «una especie d’introito qu’inclúi una grabación antigua d’un discu de pizarra», l’instrumental «Daón» que da nome al discu y versiones de tres pieces icóniques d’aquel folk de los años 80: una reinterpretación de «Montesinos» (del discu Ofiusa), otra de «Na ca’l fuau» (el cantar del fináu Fernando Largo que nomaba al primer álbum de la formación) y una versión de les «Muñeires de Bual» que grabara Trasgu en La Isla de Hélice en 1983; discu pioneru del folk celta asturianu.
Suscríbite a les nuestres novedaes
