El grupu Buir va subir al escenariu del Teatru-Auditoriu de Grau esti sábadu 31 de xineru a les 19:30 hores, nuna nueva cita cola música de raigañu y les sonoridaes cuidaes que caractericen la so propuesta. El proyectu ta formáu por Vero Rubio, Xosé Ambás y Pepín de Muñalén, trés nomes bien conocíos dientro del panorama musical asturianu, que xunten trayectories y sensibilidaes pa dar forma a un directu intimista, nel que la tradición ye la protagonista
El conciertu va celebrase nel marcu de la programación cultural del Conceyu de Grau y cuenta con entrada de baldre, con un máximu de dos entraes por persona, que puen recoyese na Biblioteca de Grau dende’l llunes 26 de xineru a partir de les 14:30 hores. El grupu, amás, anuncia otros cinco conciertos en L.lena, Cangas del Narcea, Xixón, Corvera y Porrúa, entá por confirmar fecha y llugar.
Buir ye un proyectu musical de creación recién nacíu, que se dio a conocer n’avientu del añu pasáu en Xixón. El trío presenta un repertoriu basáu na música asturiana, nel que flauta, pianu y voz dialoguen pa construyir un soníu cuidáu y expresivu. La so propuesta plantea un percorríu musical que bebe de la tradición y de la reinterpretación contemporánea del cancioneru popular, apostando por un formatu cercanu, intimista y de gran carga emocional.
Suscríbite a les nuestres novedaes
