Últimos díes pa inscribise nos Premios de l’Academia de la Música

El plazu pa presentar candidatures a la III edición de los Premios Anuales de la Academia de la Música d’España entra na so fase final. La fecha llende pa completar la inscripción ye’l 2 de febreru de 2026 a les 22:00 hores, al traviés de la plataforma oficial de l’Academia. Esta convocatoria afecta directamente a artistes, grupos, productores y proyectos musicales d’Asturies que publicaren trabayos a lo llargo de 2025 y que quieran optar a unos premios de calter estatal.

Tres el cierre del plazu, les candidatures van ser evaluaes polos comités de nominación ente febreru y marzu. Les nominaciones oficiales van dase a conocer nel mes d’abril y la gala de entrega de premios ta prevista pal día 26 de mayu.

Categoríes d’interés pa la música asturiana

Les bases inclúin una variedá amplia de categoríes, ente les que resulten especialmente relevantes pa la escena asturiana:

• Folk / Tradicional, categoría na que pueden encaxar producciones venceyaes a la música d’arraigañu, la reinterpretación contemporánea del repertoriu tradicional o l’usu d’instrumentación propia.
• Canciones y discos en llingües cooficiales, lo que permite presentar obres cantaes n’asturianu.
• Categoríes xenerales como meyor álbum, canción, artista, producción o arreglos, accesibles a tolos estilos y formatos.

Pueden presentase obres publicaes o difundíes ente’l 1 de xineru y el 31 d’avientu de 2025, siempres que cumplan coles condiciones establecíes nes bases.