Burbús estrena esti miércoles el so primer videoclip
Esti miércoles a les 20h Burbús va estrenar el so primer videoclip, “Caldueñu“. Trátase d’una reellaboración d’esta xota tradicional asturiana fecha dende la personalidá d’esti grupu nuevu, que se define como un proyectu que nun tien «nun tien xéneru musical» porque la so música «ye xenérica en sí mesma». Esti cantar de Burbús -grupu que garra’l so nome del verbu burbusar, que ye falar en voz mui baxo con daquién pa que nun s’enteren otres persones de lo que se diz-; ye’l primeru d’una serie de singles que van asoleyar nes plataformes dixitales.
Cinco veteranos de la escena sonora asturiana formen esti grupu: a les gaites y flautes, José Luis García -director de la Banda de Gaites Villa de Xixón, Magüeta y Villa de Jovellanos-; al violín, Juan Diego Gómez -que tien tocao en proyectos d’estilos tan estremaos como’l folk, rock, techno, gypsy jazz o heavy metal-; al curdión, Ginés Fernández -músicu de formación clásica que tocó n’agrupaciones d’esti calter y tamién bandes folk-; a la voz y a la guitarra José Martínez -más conocíu nos últimos años como Ún de Grao gracies al so proyectu en solitario, anque tien tocao nuna montonera bandes-; y al baxu, chelo y coros, Javier San Marcos -venceyáu a grupos jazz y blues-.
«La música tradicional foi’l puntu de partida, pero rápidamente garremos el camín pa dir hacia un llugar alloñáu de categoríes y estilos musicales concretos», comenten dende esta formación que nel so repertoriu tien «una mecigaya de temes propios y revisiones de pieces tradicionales». El grupu nació en 2021 alredor del gaiteru y flautista José Luis García y el violinista Juan Diego Gómez y dende esi momentu fueron incorporando a los demás componentes y trabayando n’alcontrar la so personalidá. La reellaboración de “Caldueñu” va ser el primer exemplu.
