La gala presentación del concursu escolar Al Son del Cantar va ser el 27 de mayu en Castrillón

El concursu escolar Al Son del Cantar entamáu pola Rede de Normalización Llingüística y col sofitu de la Conseyería de Cultura, Política Llingüística y Turismu entra na so fase final. 10 grupos de 10 estilos estremaos tán yá trabayando na grabación de los cantares premiaos pa que too tea a puntu’l 27 de mayu, fecha na que va presentase y regalase’l CD del proyectu nuna gala que se va cellebrar nel Centru Valey de Castrillón a les 18.30h.

«Al Son del Cantar ye un proyectu d’innovación educativa escolar pal alumnáu de Llingua Asturiana y de Gallego-Asturiano de 4^u, 5^u y 6^u de Primaria y de 1^u y 2^u de Secundaria nesti cursu 2021-2022», desplica Xuan Rodríguez, responsable del Serviciu de Normalización Llingüística de la Mancomunidá d’El Cabu Peñes y ún de los promotores d’esta iniciativa. Con ella, quieren «trabayar pola normalización del asturianu nel sistema educativu» a traviés del «trabayu interdisciplinar nos centros participantes» y nagüen por «fomentar la creatividá musical y lliteraria ente l’alumnáu». L’antecedente foi nel cursu 2018-201 col nome d’El mio cantar y anguaño les novedaes son que tamién s’estendió a los conceyos falantes de gallego-asturiano y que s’incluyó «la posibilidá de que los centros desendolquen un proyectu d’innovación, desarrolláu pola Rede de Normalización, qu’incorpora más árees col envís de da-y una perspectiva tovía más interdisciplinar».

«L’acoyida per parte’l profesoráu y sobre manera del alumnáu foi mui bona», opina Rodríguez, qu’esclaria qu’«en total participaron 15 conceyos con Serviciu de Normalización y anque la mayor parte los centros se centraron nel concursu, que yá ye un trabayu interesante, tamién hubo dellos como C.P San Félix de Candás qu’amás d’esto desenrollaron tol proyectu con resultaos bien prestosos». El resultáu va vese’l 27 de mayu na gala que va acoyer el Centru Valey de Castrillón y na que, amás la participación de toles bandes que dan forma al CD, los organizadores quieren que «qu’esi día l’alumnáu que compuso los cantares pueda subir al escenariu y participar activamente na gala, como premiu a esi trabayu».

Grupos participantes

«Ente otros artistes tenemos formaciones como Calea, Dani Stylo, Pop Piquiñín, Llevólu’l Sumiciu o Toli Morilla», comenta’l responsable del SNL de Llanera sobre les formaciones participantes d’esta edición. La grabación d’una versión de los cantares ganadores a cargu d’artistes «que tuvieren dalguna rellación colos conceyos onde s’asitien los centros de los cantares ganadores, pero tamién que’l so estilu musical s’asemeyara al del cantar orixinal» y la edición d’un CD onde s’incluyen eses versiones ye’l premiu d’Al Son del Cantar. Pa Rodríguez «l’acoyida por parte de los grupos tamién ye mui bona» y camienta qu’«en munchos casos ye un retu versionar los cantares» polo qu’agradez a tolos artistes que s’impliquen en facer realidá esta idea pionera de la qu’en menos de dos meses va poder sentise’l resultáu.