El rock n’asturianu protagoniza los conciertos del vienres 8 nel Festival Internacional de la Cerveza Artesano de Llangréu
Esti fin de selmana vuelve a La Felguera el Festival Internacional de Cerveza Artesano de Llangréu (FICAL). Los xardinos de la Pinacoteca Municipal Eduardo Úrculo van enllenase los díes 8, 9 y 10 d’abril música, gastronomía y cerveza. Dientro de la programación pal vienres 8, el rock n’asturianu va ser el son protagonista, coles actuaciones d’Ilustres Patilludos a les 22h, Los Berrones a les 23h y La Tarrancha a les 2 de la madrugada. Amás, a les 18h va actuar la Banda Gaites Conceyu de Llangréu y Marisa Valle Roso va ser la pregonera del eventu a les 18.30h.
L’Área de Cultura, Educación y Política Llingüística del Ayuntamientu de Llangréu cola collaboración de La Felguera Colectivu Cultural entamen esti festival que s’articula alredor de dos exes d’ufierta cultural: la gastronómica y la musical. Amás de les actuaciones de los mentaos grupos que canten n’asturianu, tamién van tocar los gallegos Dakidarría, les xixoneses Viuda, los grupos llocales Automatic Kafka, Varón y Los Dandies, Urrechu Meana y Los Chicos Malos, Supermirafiori, Swap y Merucu; y Triángulo de Amor Bizarro, La URSS y Yawners.
Gastronómicamente, el festival va adaptase a tolos gustos y necesidades, con comida ensin gluten, vegano, vexetariano, tex-mex, d’inspiración oriental, chileno y, como nun podía ser d’otra forma, de races autóctones asturianes cola presencia nel festival de 7 foodtrucks. La selección de les cerveceres participantes en FICAL se manda pola calidá de les sos ellaboraciones y teniendo en cuenta como requisitu pa la participación la presencia del maestru o maestra cervecera de la marca. Esto cobra especial importancia dende un puntu de vista didácticu y divulgativu pa poder conocer de primera mano los procesos y técniques de fabricación y qué tipos de maltes, llúpulos, llevadures u otros materiales s’utilicen nos procesos. Nesta edición 2022 van tar en Llangréu 19 cerveceres d’ámbitu asturianu, estatal y internacional.
Dende’l Conceyu de Llangréu yá anunciaron la programación completa, que se pue ver nesti cartelu y nel Facebook del Festival:
