«Calea quier recuperar la voz vieya d’esta tierra»
La selmana pasada presentóse a traviés de les redes sociales un nuevu grupu folk: Calea. La banda ta formada por tres persones mui conocíes dientro de la música asturiana: Silvia Quesada -cantante de bandes como Tejedor, Blima, Los Gatos del Fornu, amás de nel so proyectu en solitario-, Leticia Baselgas -veterana panderetera y cantante, anguaño n’activo con L-R- y Rubén Bada -pernomáu multiinstrumentista que nesti momentu toca tamién con L-.R, ¿Aü? y Alfredo González, ente otros proyectos-. El tríu ta acabante d’asoleyar el so primer lyric video, una xota del pueblu de Candanín, nel conceyu de Valdés. Amás, Bada fala pa musicasturiana.com p’afondar no que ye Calea y por qué surde.
«Ye dalgo que tenía muncha gana de facer dende va bastante tiempu y agora que tenemos L-R asentáu y que Silvia tenía ganes de volver a la música tradicional, punxímonos con ello», desplica Rubén Bada sobre los oríxenes de la formación. El multiinstrumentista esclaria que «la idea ye facer un grupu vocal onde cantemos toos y qu’anque usemos instrumentos novedosos que nun tamos avezaos a ver na música asturiana, se vuelva a les armoníes modales; ye dicir, a recuperar la voz vieya d’esta tierra».
Nesti sen, el multiinstrumentista reflexona: «Depués de toos estos años esperimentando y afondando na conocencia de la música del país, y de los sos mecanismos y característiques, agora podemos trabayar con ella d’una manera muncho más íntima y afitada nel so espíritu» . «Nel momentu qu’empieces a ver eso ye cuando se pue ver que tenemos una música con sieglos d’historia, mui mui antigua. Sobre too nos repertorios cantaos y de determinaos instrumentos», sentencia Bada pa insistir que Calea quier trabayar dende’l «respetu a l’antigüedá d’estes pieces». La xota de Candanín ye la primer muestra de munches otres que van aportarper parte d’esti tríu nuevu.
Calca na imaxe pa sentir el so primer cantar
