La Banda Sonora de Celia Corrales
Celia Corrales forma parte de la xeneración más nueva d’artistes de la música asturiana. Cantante, panderetera y venceyada a la música tradicional dende bien neña, en 2018 xubió per primer vez a un escenariu en solitario; foi nel concursu Sácame Pola Pinta imitando a Luz Casal, y ganó. Anguaño toca nos grupos folk Abéu y Draque, dos de los nuevos nomes de la música’l país que tienen al frente a componentes d’ente 17 y 21 años.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Celia Corrales
Un discu qu’enxamás canses de sentir.
Si hai un artista que tuvo muncho impactu na mio vida y del que nunca nun me voi cansar de sentir, esi ye Bruce Springsteen, asina que’l discu tenía que ser d’elli. Podía quedame con toos, pero los Tracks del 98 tienen canciones pa tolos momentos.
Si tuvieres que formar parte d’otru proyectu musical, ¿cuál sería?
¡Ser corista de la E Street Band nun taba nada mal! Pero creo que’l sitiu onde más pego ye ente los psychobilly, igual The Cramps ye apuntar mui alto, pero prestaríame pola vida tener un proyectu d’esi tipu.
De los cantares que compusisti o interpretes, ¿cuál ye’l to preferíu?
De los d’Abéu cuéstame abondo dicir ún, pero anguaño quédome con RE3MBÁU porque tien un poco de caún de los que participamos y préstame ver qu’esta mecedura de xente suena tan potente. Sicasí, paezme que los mios cantares favoritos voi topalos ente los que tán tovía en procesu.
Col mio otru proyectu, Draque, esfruto abondo La Siega&Formigueru, que foi col que zarramos los conciertos y tuvo perbona acoyida.
«Crearía espacios públicos dedicaos esclusivamente a proyectos por y pa la mocedá. N’Asturies hai talentu abondo nes distintes disciplines artístiques, pero nun hai oportunidaes»
¿Cuándo foi la primer vez que xubisti a un escenariu y que pasó enantes, durante y depués?
Hubo varies primeres veces de xubir a un escenariu, pero la primer vez que canté sola foi nel concursu Sácame Pola Pinta nel añu 2018 y, anque foi va cuatro díes, paez que pasaron sieglos porque casi nun m’alcuerdo. Namás sé que taba mui nerviosa, pero la verdá que tar arrodiada de más xente mozo fízolo super divertío. El momentu de cantar… Esfrutélu, sí, pero faltábame xente importante ente’l públicu pa compartilo. Lo que taba nidio yera qu’aquello quería repetilo milenta veces más, y paez que tán dexándome cumplir esi suañu.
¿Qué ye lo más inxusto de ser artista?
Considerame artista igual ye demasiado atrevío, poro voi falar dende la perspectiva d’una moza que namás intenta selo.
En xeneral ta mui poco valorao, tómase como una industria de segunda, polo que nun entienden que cobremos pol trabayu fechu, paez que si nun llenes el Palaciu los Deportes nun yes naide y lo que faes nun val un res. Amás, nel mio casu, topéme con mui pocos qu’entendieran que la música yera la mio fonte d’ingresos, mientres afalagaben a otros mozos por tener ‘trabayos de verdá’ (comunes) como camareros. Munches veces yo-y dedicaba más hores y nun lo valoraron nunca.
Si fueres Conseyera de Cultura, ¿qué son les primeres coses que fadríes?
Ensin dulda crearía espacios públicos dedicaos esclusivamente a proyectos por y pa la mocedá. N’Asturies hai talentu abondo nes distintes disciplines artístiques, pero nun hai oportunidaes. Siempres pensé que faltaba un llugar onde poder ensayar y amosar los resultaos d’esos ensayos y onde ver esposiciones fotográfiques o creaciones plástiques, y que fuera accesible pa toos. Amás sedría una oportunidá pa descubrir nuevos artistes y poder invertir el nuesu tiempu llibre ensin tener que consumir, porque güei too xira alrrodiu les perres, y d’eso fáltanos a la mayoría.
«La primer vez que sentí a L-R pensé: Oi, yo también soi panderetera y nunca pensara que podía sonar tan guai fora del ámbitu tradicional puru»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Probablemente fora una combinación de muncha xente, pero m’alcuerdo que la primer vez que sentí a L-R pensé: “Oi, yo también soi panderetera y nunca pensara que podía sonar tan guai fora del ámbitu tradicional puru, prestaríame facer dalgo asina.” Y la verdá que sí, creo qu’ellos influyeron bastante no qu’acabé entamando.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Tolo que yo escucho ye de dominiu públicu y nun siento vergoña de nada, a la fin en gustos nun hai nada escrito. Pero quiciabes a la xente-y sorprenda qu’escuche techno y hardcore. Últimamente toi enganchadísima a Parkineos y Ørgie, y si me lo lleguen a dicir va dos años nun lo creo.
¿A qué personaxe públicu convidaríes a un conciertu tuyu, a pasar llueu pel backstage y pa qué?
A Pepo de Desakato. Nun lu conozco pero siempres quise coincidir con elli porque paezme un ser maraviyosu y quiero confirmalo. En xeneral prestaríame un momentu backstage colos Desakato, pa mí son grandes referentes y una parte perimportante na banda sonora de la mio vida, sedría’l mio gran momentu fan.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Esta ye fácil, Incorrectos de David Artime. Nunca me punxe a componer, pero pa esti llibru esfrutaría muncho enfretándome a esi retu pendiente
Asina fala Celia Corrales de los cantares qu’escoyó pa la so playlist
1. Texeora de Bayo – Ún de Grao
Na mio casa Ún de Grao ye imprescindible y tengo mui bones alcordances cantando nel coche esti discu. Amás vilu varies veces en directu y esti tema préstame’l que más.
2. Asturies borracha – Skama la rede
Ye poneme esti cantar y entamar a glayala como una lloca.
3. En Pie de Xera – Misiva
Con esti grupu aficioneme al punk n’asturianu y amás foi l’ultimu pogu nel que me metí nantes del andanciu.
4. Danza la Xarra – L-R.
El mundu de la música n’asturianu ye de los moscones y L-R nun podía faltar. Esti cantar trespórtame a un conciertu nel que lo pasé xenial y ponme señardosa.
5. Gone – Staytons
Anque ye un cantar bien triste a mi traeme paz y amás tolos conciertos de Staytons traxéronme mui bonos momentos.
6. Somos – La Tarrancha
Esti tema puedo describilo con una pallabra, euforia.
7. Achistáronmela-Xiringüela – Jacobo de Miguel, Lee Wolfe y Mapi Quintana
Esti discu enteru ye un prestor, pero esti tema ye lo siguiente.
8. Mañana fría – Dixebra y Desakato
Un himnu del que nunca nun me voi cansar, pa mi esti ye’l tema col que zarrar les fiestes de práu y non l’Asturias de Víctor Manuel, anque tamién ye respetable.
9. Marcelino Twenty Five – Los Vólidos
Los sos conciertos nel Savoy arrodiada de xente baillando son melicina pal alma y esti siempre lu cantamos a coru tol públicu.
10. Muerte en Motilleja – Rodrigo Cuevas
Anque esti cantar llévame a un momentu mui difícil na mio vida, siempres esfruto escuchándolu.
11. …Que La Tierra – Mala Reputación
Foi’l primer cantar que sentí d’esti grupu y agora esúcholos en cantidá.
12. Autodefensa, muyer – Ochobre
La voz de la cantante respiga. Molame’l mensaxe y el grupu en xeneral, porque ye raro ver muyeres nunca escena mayoritariamente masculina y presta.
13. Saltos en Camperes – Mota Blues
Últimamente toi a fueu con estos chavales, tienen tolos soníos que m’encanten y amás les lletres son una gozada.
14. Tough Lover – Etta James
La mio voz femenina favorita ye esta muyer, y con esti discu acabó d’enamorame.
15. Wake Up Alone – Amy Winehouse
Quiciabes l’artista que más influyó en mi en munchos aspectos, faenos falta y échola de menos.
16. Willie O Winsbury – Ye Vagabonds
El mio cantar folk favoritu.
17. Cerebros Destruidos – Eskorbuto
Esta lletra da voz a una parte importante d’una xeneración que lo tuvo difícil pa ver la lluz al final del túnel.
18. Being Alive – Tony Bennett
Un clásicu de los musicales, una de les mios grandes aficiones, con un mensaxe que me fizo pensar.
19. I See A Darkness – Johnny Cash
De los últimos discos de Cash marcáronme varios cantares, pero esti ye especial.
20. Todos me dicen – Extremoduro
Dexélos pal final pero son los más importantes. Descubrí a Extremoduro con 11 años y dende ehí acompañáronme en toles etapes, son el mio grupu favoritu. Pa cada momentu de indecisión hubo un cantar d’ellos que me ayudó.
