Nos primeros años de los 90 la, daquella, Conseyería d’Educación, Cultura, Deportes y Xuventú del Gobiernu Asturianu, tenía abierta una llinia de subvenciones dirixíes a la Producción Fonográfica n’Asturianu; con ella quería afalar la creación musical nes llingües propies del país. La realidá foi que, xeneralmente, les bandes que se presentaron a esta convocatoria cantaben mayoritariamente en castellanu y optaben a ella pa poder publicar un discu.
Otra variante yera la de proyectos creaos a costa fecha p’acceder a estes ayudes, nesta hai qu’incluyir una producción publicada col nome Andecha del añu 1992. La so formación yera un amiestu d’intérpretes provinientes d’ámbitos musicales estremaos como’l pop, el rock y el folk, ente ellos Luis Núñez (compositor de los cantares y miembru de la banda xixonesa Fuera de Serie), Fernando Largo (Beleño), Rody (Ubiña) o Mento Hevia (Crack, Gueta na Fonte, Orquesta Céltica Asturiana).
La cinta incluyía cuatro temes de calter pop-rock con dalgún toque folki y tuvo una difusión pequeña y artesanal. Naquel momentu representó una rareza dientro de la música d’espresión asturiana, enfocada fundamentalmente hacia los soníos folk y tradicionales. El tema tituláu ‘El cantar del folganzán’ diba apaecer posteriormente nel trabayu compilatoriu publicáu pola Xunta pola Defensa de la Llingua Asturiana llamáu L’asturianu vive, la llucha sigue, del añu 2001.
Suscríbite a les nuestres novedaes
