La Conseyería de Cultura, Política Llingüística y Deporte ta acabante d’anunciar que va entamar una tercer edición de Música en Rede. Alcuentru profesional, les xornaes profesionales de la industria musical d’Asturies. Del 14 al 16 d’abril Llaboral Ciudá de la Cultura va acoyer esti eventu que trabaya pa que «artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies».
Como tolos años, esti alcuentru va tener un programa variáu d’actividaes: XUNTES (alcuentros comerciales), CONXUSTES (meses redondes), ERBÍES (talleres técnicos) y LLABOR (showcases); amás de dalgunes novedaes que dende Asturies Cultura en Rede -entidá xestora de les xornaes- van dir anunciando.
Música en Rede nació en 2024 y nes sos ediciones anteriores participaron centenares de profesionales de la industria musical d’Asturies, asina como d’otros territorios de dientro y fuera del Estáu español qu’aporten a Xixón pa conocer de primer mano dalgunes de les propuestes musicales d’equí. Son unes xornaes pa la interellación ente axentes de la industria, pa comercializar proyectos musicales y pa la formación y l’alderique. Amás programa añalmente diez showcases gratuitos nos que la música n’asturianu ta bien presente.
Suscríbite a les nuestres novedaes
