Confirmaos 40 conciertos con música n’asturianu de marzu a xunu
Depués de dos años d’andanciu, había muncha gana de dir volviendo a la normalidá y eso nótase na montonera de conciertos que tán yá programaos pa los cuatro meses vinientes. Presentaciones de discos, estrenos d’espectáculos, conciertos especiales por aniversarios… son dalgunes de les actividaes que van cuntar con presencia de la música fecha nes llingües autóctones d’Asturies y que van espardese hasta la fecha per 27 conceyos. N’axenda de musicasturiana.com tán disponibles les feches.
Marzu entama con 14 eventos confirmaos ente los que destaquen la presentación de los debuts discográficos de Baxel -esti xueves 3 en Posada de Llanes- y Algaire -el sábadu 5 en Mieres-; l’actuación de Nacho Vegas y L-R del vienres 4 nel Teatru Xovellanos -con toles entraes yá escosaes-; el conciertu X+2 Aniversariu de Misiva del 12 de marzu na sala Gong d’Uviéu; o l’estrenu enriba los escenarios del tríu bal-folk Urso Dakoff en Bual el sábadu 12. Tamién presenta Toli Morilla un nuevu espectáculu con dos conciertos -el 18 en Colunga y el 24 en Navia- nos qu’interpreta un repertoriu basáu en poemes de muyeres asturianes. Amás, el 12 de marzu en Piloña, vuelve una de les actividaes poles que más xente de la música tradicional ta naguando: la Nueche en Danza.
Abril va suponer l’estrenu d’una de les xires que más conciertos confirmaos tien nesti tiempu; la de Calea. El nuevu proyectu folk formáu por Silvia Quesada, Leticia Baselgas y Rubén Bada tien 9 actuaciones programaes hasta setiembre y la primer d’elles va ser el 9 d’abril nel Teatru Riera de Villaviciosa. Per otru llau, la Banda Gaites Llariegu va cellebrar el so 25 aniversariu el 2 d’abril en Sariegu, mentes que Fontoria presenta’l so discu nuevu ‘Sirio’ el 16 d’abril na Casa la Cultura de L’Infiestu. Les actuaciones de ‘Restolando’ de David Varela, de Los Gascones y de Silvia Quesada tamién tán confirmaes pa esi mes.
Del jazz al punk
El jazz de raigañu ye ún de los xéneros que más va poder sentise ente mayu y xunu gracies a les actuaciones de Slum Suit, Lafu y Rebeca y Maramoniz -el nuevu proyectu capitanéau por Mapi Quintana y César Latorre-. Tamién va haber espaciu pa la canción d’autor –Fran Avilés presenta ‘Roses’ en Cabranes-; pa la lírica de Tina Gutiérrez; pal punk de Skontra -que vuelve a los escenarios dos años depués- y pal folk, la gaita, la pandereta y la tonada coles actuaciones de Los Gascones, Celso Díaz, Eva Tejedor & Les Pandereteres y Anabel Santiago. Hasta van amestase punk y pandereta cola charra “Ente’l punk y les ruxideres. Muyer, contemporaneidá y música tradicional asturiana” que Leticia Baselgas va dar en Grau.
Munches d’estes actividaes formen parte d’Asturies Cultura en Rede, el circuitu d’eventos culturales impulsáu pola Conseyería de Cultura, Política Llingüística y Turismu; anque tamién hai eventos programaos por asociaciones y entidaes privaes. Dende musicasturiana.com va facese un siguimientu d’ello ampliando información con noticies y calteniendo l’axenda actualizada.
