Yá aportó “La Misiva”, el videoclip col que Misiva celebren 12 años de punk-rock

Un mensaxe d’optimismu, d’ilusión y un homenaxe a la so trayectoria. Asina ye “La Misiva“, el nuevu cantar y videoclip que ta acabantes d’asoleyar Misiva. Nel videu realizáu por Titi Muñoz cunten cola collaboración de dellos familiares y collacios del grupu -ente ellos xente de bandes como Desakato o Mala Reputación– y tresmiten tola enerxía que lleva acompañándolos per más d’una década. Esti nuevu cantar, xunto al conciertu que van dar el próximu 12 de marzu na sala Gong d’Uviéu, son parte de les acciones coles que la banda moscona celebra 12 años de punk-rock n’asturianu.

«Tamos fartos de males noticies, de nun poder ver a la xente, a la familia, de nun poder tocar nin dir a conciertos, de nun vevos, de nun sentivos… Queremos qu’esto sía un chute d’enerxía pa encarar el final del andanciu y que volvamos a venos coles ganes de dexar esto atrás pa siempre», comenten Misiva sobre la intención de por qué celebrar esti X+2 Aniversariu con optimismu, dexando pa prau l’atmósfera apocalíptica y murnia que presentaben nel so trabayu caberu ‘L’Ultimu Aliendu‘.

“La Misiva” ta compuesto durante la pandemia, ta grabáu en l’OVNI Estudio con Pablo Martínez (Desakato) y fala d’esti nuevu estáu d’ánimu de los de Grau. Fala de que magar los confinamientos, les restricciones y tolo que tuvieron que dexar pa un llau; magar que los más de 10 años que lleven y de que va pasando’l tiempu pa toos; ye dicir, magar toles llaceries que-yos puedan pasar, Misiva sigui’l so camín cola mesma enerxía de siempre, cola mesma ilusión pero ensin complexos y quitándose tolos corsés que podíen tener si ye que dalguna vez los tuvieron. Musicalmente amuesa un soníu más contundente y novedosu, mentes que gráficamente quixeron apostar xunto al so diseñador “Rubonón” por «collores más vivos, y elementos más gayoleros».

Conciertu X+2 Aniversariu

Tres estos cuasi dos años de parón -nel que namás actuaron en formatu eléctricu nel Kuivi Popup- y yá recuperaos de nun poder celebrar el X Aniversariu en 2020, Misiva vuelven a los escenarios el próximu 12 de marzu a les 21.30h na sala Gong d’Uviéu. Nesti conciertu X+2 Aniversariu van repasar estos doce años n’activo y anuncien que va ser «un conciertu especial, con delles sorpreses y invitaos». Les entraes pal conciertu -nel que van tar acompañaos de Los Bárcenas-, yá se pueden mercar online o en La Bomba Records d’Uviéu por un preciu anticipáu de 10 euros.

Comprar discos de Misiva na tienda online