Corvera, Avilés y Llangréu, próximes paraes de la charra “Hai una llínia trazada”, dedicada a la historia de la música asturiana
El ciclu Autores nel camín, entamáu pol circuitu Asturies Cultura en Rede, vuelve a acoyer la presentación de la obra ganadora del XXVI Premiu d’Ensayu ‘Máximo Fuertes Acevedo’. Trátase d’un trabayu sobre la historia de la música asturiana tituláu Hai una llinia trazada, del que ye autor el músicu y productor cultural y audiovisual Xune Elipe. Nél fai un repasu exhaustivu pol fechu musical asturianu dende la prehistoria hasta l’actualidá, aparándose nos movimientos y intérpretes más importantes, y rellacionándolo col contestu políticu y social de cada periodu.
Les próximes paraes d’esta charra-presentación van ser el xueves 18 de payares, a les 18h, nel Centru Sociocultural de Les Vegues (Corvera); el miércoles 24 de payares, a les 19.30h, na Casa la Cultura d’Avilés; y el xueves 25 de payares, a les 20h, na Casa de Los Alberti de Ciañu (Llangréu).
A la espera de la publicación d’esti ensayu, l’autor preséntalu globalmente y ufierta una visión sobre los tres momentos fundamentales na música del país: los sos oríxenes y formación como un sistema sonoru autóctonu (del sieglu XII n’alantre), el pasu d’una música popular a otra d’autor y el surdimientu de los grandes clásicos (sieglu XIX y principios del XX) y l’españíu que supunxo l’asturianismu modernu na creación de la música asturiana actual (de los años 70 del sieglu XX hasta anguaño). L’actu va desenvolvese de manera dinámica y col emplegu de bien de materiales audiovisuales y sonoros.
