Cuando les ondes falaron n’asturianu

Cúmplese’l cuarenta aniversariu de la celebración del Día de la Radio n’Asturianu

Hasta mediaos de los años 70 del sieglu XX la presencia de la llingua asturiana nes onde radiofóniques fuere anecdótica dafechu, restrinxida a conteníos mui determinaos, nos que primaba una visión diglósica de la mesma y un tratamientu ensin nengún enfotu normalizador. A principiu d’aquella  década, l’asociación Amigos del Bable -fundada en 1969- llegó a contar con dalguna sección o facer collaboraciones en varies emisores, nelles espardía’l so trabayu y programaba los discos que diben publicando, dedicaos fundamentalmente a la tonada y los monólogos, amás de recitaos de poesíes de tipu festivu o folclóricu. Nun sería hasta la llegada del Surdimientu (1974), cola organización Conceyu Bable cuando esta situación escomienza a cambiar; ello ye qu’un grupín de rapazos venceyaos a la mesma, qu’estudiaben y facíen activismu na Universidá d’Uviéu, principien a facer un programín selmanal de quince minutos na emisora Radio Asturies (Cadena SER) llamáu Nortiando. Los conteníos yá son agora estremaos y novedosos, falando de temes d’actualidá (deporte, política, cultura…), espardiendo’l discursu nuevu sobre la llingua asturiana que taba armándose naquel momentu y dando a conocer la escena musical llariega que taba surdiendo (Nuevu Canciu). Depués d’unos años garremos el relevu otru piñu de mozos y moces qu’entremos na Universidá y nos organicemos nel colectivu Camaretá Universitaria, ente ellos taben escritores anguaño de renome como Xuan Bello o Adolfo Camilo, amás de quien firma esti artículu, dándo-y aire nuevo y un estilu orixinal, con estayes dedicaes a la lliteratura, la música o la sociedá, ente otres.

Depués d’aquella primer esperiencia entro en contactu cola dirección de Radio Popular d’Avilés (Cadena COPE), a la que taba acabante de llegar un periodista catalán, Carlos Sánchez García, y escomienzo a collaborar nesta emisora. Nella faigo programes como Albintestate (escomenzó en 1982), un magazín cultural y d’actualidá, que llegaría a emitise selmanalmente tolos sábados ente les 8:00 y les 10:00 hores, espaciu que llegaría a tener bien d’audiencia y repercusión nel conceyu avilesín y la redolada; Informativu Cultural Asturianu (martes y xueves de 16:50 a 17:00), dedicáu a l’actualidá cultural del país; La Mezclienda, espaciu braniegu de calter musical xeneralista; o Rockmería (vienres de 15:00 a 16:00), dirixíu a esplorar les conexones ente la tradición y la modernidá nel ámbitu de la música, emitiríase depués en Radio Sele y la so última etapa desarrollaríase a lo llargo de varios años en RPA.

Nel añu 1983, l’Academia de la Llingua fai un llamáu a la sociedá en xeneral y a los medios de comunicación en particular pa que celebren el IV Día de les Lletres Asturianes con actividaes especiales dedicaes a esa xornada. Conque, el director de Radio Popular d’Avilés pídeme que-y presente un proyectu pa desenvolver aquel primer vienres de mayu y d’ehí surde’l Día de la Radio n’Asturianu. La programación especial emítese al traviés de la FM (daquella tovía la onda media yera la principal), pela mañana dende’l l’estudiu de la emisora colos programes Copediscos -radiofórmula musical-, Informativu y Café y música -dedicáu a los compositores sinfónicos asturianos-; y a partir de les 15:30 en directo con una unidá móvil dende la Ilesia Vieya de Sabugo, abierta al públicu, pela que pasaríen el pintor Favila, el cantautor Carlos Rubiera, l’estudiosu de la cerámica negra y el bron del pueblu avilesín de Miranda José Manuel Feito, Chus Pedro (Nuberu), Vicente Díaz, el conceyal de cultura d’Avilés José Martínez, el gaiteru Manolo Quirós o la cocinera y gastrónoma Pilar Ovies, ente otros invitaos y invitaes. La programación acabó con una mesa redonda col títulu «Asturies: una realidá cultural estremada y viva», nella participaríen dos miembros del Colectivu Pedagóxicu d’Asturies, ún de l’asociación cultural Arfueyu y l’economista Xabel Tamargo. Seríen ocho hores ininterrumpíes de radio en llingua asturiana, que necesitaron un trabayu previu de preparación fondu y la collaboración del personal de la emisora, tanto de periodistes y llocutores como de técnicos, amás de la consulta a llingüístes pa ufiertar la máxima corrección nesi aspectu. Llegaríen a celebrase dos ediciones más del Día de la Radio n’Asturianu coincidiendo cola xornada dedicada a les nuestres lletres, per elles pasaríen bien d’invitaos y invitaes, ente ellos el daquella presidente del Gobiernu Asturianu, Pedro de Silva, o’l cantante mierense Víctor Manuel, qu’asturianizaron el so llinguaxe nes entrevistes; amás d’emitise especiales como una mesa redonda sobre les conexones -históriques, culturales, musicales, emocionales…- ente Asturies y Bretaña, na que tuvieron presentes persones perbién conocedores del tema como Lisardo Lombardía, Astur Paredes o Ignaciu Llope.

Ye bien llamaderu que toa aquella esperiencia pionera de radio en llingua asturiana fuere desaniciada cuando a la dirección de Radio Popular d’Avilés llegó una periodista asturiana, que nun quixo continuar con aquel procesu novedosu y ilusionante de normalización social. Aquel bagaxe llevaríemoslu depués a Radio Sele, cuando escomienza a emitir nel añu 1986, nella realizaríemos programes como Al Debalu o’l yá nomáu Rockmería; al traviés del so dial fadríense les primeres retresmisiones deportives n’asturianu (especialmente fútbol y Fórmula 1) y daríen los sos primeros pasos collaboradores qu’anguaño son profesionales en medios públicos o privaos. La creación d’un ente de comunicación públicu asturianu nel 2005 (RTPA) taba llamada a ser la correa de tresmisión de tou esti llabor, convirtiendo estos antecedentes na base sobre la que sofitar una programación comprometida cola normalización llingüística y social de los idiomes propios del país. Sicasí, depués d’un primer momentu esperanzador na radio autonómica, qu’escomenzó les sos emisiones con una presencia del asturianu bultable, nun s’estableció un criteriu claru y decidíu a la so presencia nel mediu, quedando anguaño reducida a la testimonialidá, cuando non a la intrescendencia.

A cuarenta años d’aquel I Día de la Radio n’Asturianu, constatamos cómo’l tratamientu de les llingües propies nesi mediu de comunicación ta ancláu en clixés anteriores a aquella esperiencia; nin les cadenes privaes nin l’ente públicu foron quien a afondar nella, prisioneros quiciaves d’unos directivos prexuiciosos que nun acaben de ver el potencial que pue suponer sentir na radio lo que na cai ye normal.

Xune Elipe. Responsable de Discos L’Aguañaz / Goxe Producciones.