Foi en 1889 cuando la marca de sidra El Gaitero contrató a Ramón García Tuero El Gaiteru Lliberdón como imaxe del so productu más emblemáticu: la sidra axampanao. Tuero viaxaría esi añu representando a esta firma comercial a la Esposición Mundial de París, ún de los grandes eventos del cambiu de sieglu. Pero’l popular gaiteru nun taba representando namás un productu; yera tamién la imaxe del país, al tratase ésta d’una empresa con marcada identidá asturiana que quería amosase asina énte’l mundu. Esti fechu marcaría l’aniciu de la internacionalización de la música asturiana va más de 130 años, entamando asina un procesu d’esportación de la cultura propia que foi continuo a lo llargo les distintes décades y qu’aporta hasta nuestros díes.
«José Remis Ovalle grabó’l so primer discu n’Arxentina y llueu tocó per catorce países d’América percorriendo cásique 70.000 kilómetros»
Mesmamente, El Gaiteru Lliberdón volvería a participar na Esposición Mundial de París en 1900 -onde-y concedieron la Medaya del Méritu, el so primer gallardón internacional-, na Esposición Internacional de Buenos Aires (1911), na Esposición Universal de Barcelona (1929) y na Esposición Iberoamericana de Sevilla (1929). Amás actuaría per una montonera países d’Europa y América: Francia, Alemaña, Italia, Inglaterra, México, Cuba, Puerto Rico, Chile, Arxentina y Estaos Xuníos; y grabaría pa les compañíes discográfiques más importantes del momentu: Odeon (Londres), Columbia (Nueva York) y Pathé (París). Too esto convierte a Ramón García Tuero na primer gran figura popular, mediática y internacional de la nuestra música. Nun sería la única d’aquelles primeres décades del sieglu XX. El reconocíu musicólogu Eduardo Martínez Torner fixo xires per Cuba y Méxicu acompañáu pol cantador d’asturianada José Menéndez Carreño Cuchichi. Los sos estudios y conferencies lleváronlu a dellos países y, dempués de tener qu’exiliase a Londres a cuenta de la Guerra Civil, dirixó un programa radiofónicu dedicáu al folclor na prestixosa BBC.
Averándonos yá a metá del sieglu pasáu, destaca la figura del cantante xixonés Orestes Menéndez. En 1947 marcha a los Estaos Xuníos, onde llegaría a ser contratáu dieciocho años siguíos. Ellí algamaría sonadía interpretando pieces de los xéneros más estremaos, pero al empar sería reconocíu como un cantador escepcional de tonada. Bona cuenta d’ello da’l discu entituláu Aires Asturianos (Spanish Folk Songs), publicáu pol sellu neoyorquín SMC Pro-Arte en 1958 y del que se pueden sentir dalgunos temes restolando per YouTube. Nesa década de los cincuenta otru gaiteru embarcaríase nuna xira americana que duraría tres años y que percorrió cásique 70.000 kilómetros. Foi José Remis Ovalle, que grabó’l so primer discu n’Arxentina y que tocó llueu per 14 países, visitando ciudaes como Santiago de Chile, Lima, Panamá, La Paz, Cartagena de Indias, Curaçao, Santo Domingo, Trujillo, Puerto Rico, San Francisco, Filadelfia, Pittsburg, Washington, Miami o Los Ángeles, onde llegó a actuar énte les cámares de televisión de Hollywood.
Asturianos emigrantes
Esta sonadía internacional de la música’l país a metá del sieglu pasáu nun podría entendese ensin un rasgu distintivu de la identidá asturiana como ye’l de la emigración. Esos milenta “Asturianos emigrantes” a los que La Pastorina dedicaría-yos el so exitosu cantar fueron gran parte de los consumidores de música’l país acullá de les nuestres llendes. Sicasí, nun fueron los únicos, como amuesa l’interés de discográfiques, medios de comunicación, marques comerciales y promotores por programar, patrocinar y editar a unos artistes de música asturiana que-yos daben rentabilidá económica. Un exemplu de too esto ye’l de José González El Presi. La compañía tabaquera Partagás contratólu en 1957 p’actuar en Cuba xunto a pernomaos cantantes como Lucho Gatica o Olga Guillot. Tando n’América, lo que diba ser una xira d’un mes convirtióse nun periplu de 13 años. Estaos Xuníos, Hondures, Ecuador, Venezuela, Chile… acoyeron los sones d’esti míticu cantante qu’acabaría viviendo unos años en México y grabando ellí dellos discos, ente los que destaca ún cola Orquesta Sinfónica de Bellas Artes de México.
«La señaldá que sentíen los emigrantes asturianos tresformóse n’éxitu comercial p’artistes como El Presi, La Pastorina o Vicente Díaz»
Nestes xires, los Centros Asturianos xugaron tamién un papel fundamental y yá na década de los setenta y ochenta fueron María Rosa Quero La Pastorina y Vicente Díaz quienes percorrieron estes cases de la diáspora asturiana non namás n’América, sinón tamién tamién n’Europa, por mor de que nos años sesenta hubo países como Suiza o Bélxica acoyeron a milenta trabayadores d’Asturies. La señaldá que sentíen estes y estos espatriaos tresformóse nun descomanáu éxitu comercial como amuesa que La Pastorina vendiera más de 175.000 discos de la primer tirada d’Asturianos Emigrantes, editáu en 1972 pola histórica discográfica Columbia Records y que contién cantares de temática costumista como “Ya suena la gaita”, “Soy de un puebliquín de Asturias” o “Ye pequeña y morena”. Anque ella tuvo que retirase pronto de los escenarios, foi Vicente Díaz l’enllenapraos quien-y dio relevu nesta xera na década de 1980.
La conexón celta
Asturies ta enmarcada xeográficamente dientro del Arcu Atlánticu, compartiendo cultura celta con otros países que pertenecen a esta macrorrexón. Ye asina como, amás de los intereses de marques por presentase ente’l mundu como asturianes y del efectu de la emigración asturiana, l’interceltismu ye otru de los elementos que más contribuyó a la esportación de la música’l país; sobre manera a partir de los años noventa. Llan de Cubel xiraron per Estaos Xuníos y Europa; Felpeyu actuaron en cuatro de los cinco continentes y fixeron tres xires per Australia; y otros nomes del folk celta como Corquiéu, Tejedor o Xera tamién llevaron la so música a países como República Checa, Alemaña, Escocia, Portugal, Irlanda o Kuwait. Los cientos de miles d’espectadores qu’asisten a festivales como’l Interceltique de Lorient (Bretaña) o’l Celtic Connections (Glasgow) conocieron lo que ye Asturies y la so cultura gracies al llabor de los nuestros músicos.
«L’interceltismu ye otru de los elementos que más contribuyó a la esportación de la música’l país; sobre manera a partir de los años noventa»
Entraos yá nesti mileniu, hubo un gaiteru que más de cien años dempués siguiría la sienda abierta por El Gaiteru Lliberdón y continuada por José Remis Ovalle. Foi José Ángel Hevia que col discu Tierra de Nadie, editáu pola multinacional EMI en 1999, algamaría’l mayor éxitu a nivel mundial d’un gaiteru (asturianu o non). Les ventes foron xabaces, llegando a cerca de los dos millones de copies vendíes y editándose’l discu en cuarenta países, convirtiendo asina al gaiteru maliayu nun auténticu fenómenu. Too ello pasó nun contestu d’auxe comercial de la música celta y de la llamada world music y, dientro d’esti procesu, la música asturiana pudo sacar provechu. Mesmamente, el boom que se dio na gaita nun sería’l mesmu ensin la repercusión mediática y popular d’Hevia.
Amás de la conexón celta, la música asturiana tamién interrellacionóse per otres víes con otros territorios gracies a cantar a les causes globales y llocales d’esti mundu nuna llingua minorizada. Dixebra ye’l mayor exemplu. Si bien nunca fueron quien a tener la mesma repercusión qu’otres bandes asemeyaes d’otros territorios como Negu Gorriak o Obrint Pas -equí notóse la debilidá de la industria musical propia, del movimientu popular y l’ausencia de polítiques culturales amañoses-, sí qu’actuaron pel País Vascu, Galicia, nel prestixosu Mercat de la Música Viva de Vic (Catalunya) o nel Liet International, l’Eurovisión de les llingües minorizaes del que foron la primer banda asturiana en participar. El so rock astur tamién los llevó a tocar delles vegaes en Lorient.
Marca Asturies
Estos artistes, otros tantos más y milenta bandes de gaites y grupos de baille qu’actúen davezu fuera de les nuestres llendes, bien podríen ser exemplu de lo que se define como diplomacia cultural. Representaron (y representen) internacionalmente a Asturies gracies a amosar la nuestra cultura y compartila con otros pueblos del mundu, fomentando asina les rellaciones internacionales y l’intercambiu cultural. Son una potencial Marca Asturies a la que se-y podría sacar muncho más provechu económicu, social y cultural si les instituciones públiques, les empreses y los medios de comunicación tuvieren altura de mires y tomaren conciencia de lo muncho que significa a tolos niveles qu’un artista asturianu actúe nun festival que congrega a 900.000 persones o qu’un grupu d’equí faiga tres xires per Australia. Tradúzse en cuestiones como autoestima colectiva, reforzar la nuestra identidá, oportunidá pa xenerar negocios tresnacionales y rellaciones polítiques, atrái turismu… Sicasí, tol establishment patrio lleva décades desaprovechando estes oportunidaes y tratando a la cultura propia y a la so industria como una caxigalina cola que cubrir los espedientes de la Conseyería de turnu o enllenar a lo xo les hores muertes de la RPA los fines de selmana. Mui lloñe queda tamién la época na qu’empreses privaes queríen amosar la so identidá asturiana mundu alantre y pa ello firmaben contratos con intérpretes de música asturiana.
«Discográfiques, medios de comunicación, marques comerciales y promotores interesáronse internacionalmente por unos artistes de música asturiana que-yos daben rentabilidá económica»
Un reflexu de too esto vivímoslu el pasáu 2023. Al mesmu tiempu que Rodrigo Cuevas ta algamando que la música asturiana vuelva tener un éxitu internacional bultable o mientres que Xosé Antón Ambás y Ramsés Ilesias compartíen los nuestros sones n’Etiopía gracies a l’Agencia Española de Cooperación Internacional para el Desarrollo, inaugurábase l’AVE Madrid-Asturies y el gobiernu asturianu anunciaba siete millones d’euros en promocionar esta ruta. Tamién estrenábase una web oficial de turismu a la qu’enllazaben distintos banners de publicidá en medios de comunicación estatales. La paradoxa ye que mientres los nuestros artistes tán visibilizando la Marca Asturies ensin supone-y nin ún solu euro de gastu a les arques públiques asturianes, la propia web oficial de turismu nun fai nin una única mención a la música asturiana -nin a otres espresiones culturales de raigañu-. Ye l’equivalente a daqué tan inconcebible como qu’Andalucía se promocione internacionalmente ignorando’l flamenco; pero n’Asturies tapecer lo propio asúmese con normalidá.
«Ye inconcebible qu’Andalucía se promocione internacionalmente ignorando’l flamenco; pero n’Asturies tapecer lo propio asúmese con normalidá»
Por eso, nesti añu nel que siguimos teniendo la suerte de que Rodrigo Cuevas siga arrasando mundu alantre cola so música asturiana; nel que’l folk, el rock, la electrónica y les agrupaciones folclóriques van siguir faciendo’l so llabor con xeitu; nel qu’hai una tendencia per parte de ciertos sectores progresistes del establishment estatal n’apostar pola diversidá llingüística y cultural y pol mundu rural -un exemplu ye’l Premio Nacional de las Músicas Actuales que’l Ministeriu de Cultura dio-y a Rodrigo Cuvas-; y nel que tolos poderes asturianos van puxar pol turismu como una de les grandes soluciones económiques pal país; ye necesario que nun s’escaeza’l papel que lleva xugando la música asturiana dende va más de 130 años. Podemos esportar una materia prima única y inagotable qu’amás tien la capacidá de xenerar arguyu polo de casa. Namás falta que toles partes implicaes toquen les tecles necesaries pa saber aprovechar esti momentu.
Suscríbite a les nuestres novedaes
