Del xueves 27 al sábadu 29 el Parque de los Hermanos Castro acueye una edición nueva del Tsunami Xixón, ún de los festivales punk-rock más importantes de tol Estáu. Esti añu la música n’asturianu va garrar más protagonismu que nunca gracies a les actuaciones que van dar el xueves 27 Misiva -que tien tol so repertoriu n’asturianu-, Desakato -qu’en tolos sos discos inclúi ún o dos cantares na llingua materna de los componentes- y Mala Reputación -qu’amuesen davezu’l so compromisu llingüísticu y tienen dellos temes n’asturianu-. Amás la cita va ser mui especial porque estes tres formaciones tienen mui bona rellación ente sí y porque va ser el conciertu de despidida de Desakato n’Asturies; polo qu’hai munches espectatives sobre les sorpreses y la emotividá qu’estes tres bandes van descargar enriba del escenariu d’esti festival xixonés.
Misiva ye una de les bandes más renomaes de la escena punk-rock d’Asturies. La so trayectoria principió en Grau en 2010 y ta marcada por facer un punk-rock rápidu y melódicu, influyíu por nomes de la escena californiana como Bad Religion o Rancid. Anque los sos trés primeros discos tán en dos versiones -una toa n’asturianu y otra toa en castellanu-, dende’l cuartu trabayu yá namás asoleyó la versión n’asturianu, llingua na qu’interpreten tamién tol so repertoriu en directo y que sonó en festivales tan prestixosos como’l Resurrection Fest. Toquen a les 17.10h nel Tsunami Xixón.
Desakato ye una de les bandes más importantes del rock d’Asturies y tamién del Estáu español. El 11 de payares de 2023 van dar el so conciertu últimu dempués de 20 años d’actividá ininterrumpida; dos décades nos que cinco rapazos de Llanera llegaron a lo más alto del rock estatal a base de trabayu, constancia y bon facer. Tamién amosaron siempre’l so compromisu cola llingua asturiana, visibilizando la realidá llingüística del país nos milenta conciertos que dieron ente aforos siempre enllenos de xente que vibra cola enerxía qu’esta formación tresmiten enriba d’un escenariu. Toquen a les 18.40h nel Tsunami Xixón.
Mala Reputación ye una de les formación más veteranes del rock fechu n’Asturies. Formada en 1995 en Cangues d’Onís, tienen 9 trabayos publicaos que destaquen pola so evolución y madurez; dende unos entamos más punk-rock, hasta facer anguaño un rock posáu, cuidáu y con muncha personalidá propia, que fai d’esti cuartetu una formación única dientro de la escena rockera asturiana y estatal. Dientro del so repertoriu n’asturianu destaquen himnos como «Sin Atadures», «Raigaños» o «Fálame». Toquen a les 23.35h nel Tsunami Xixón.
Suscríbite a les nuestres novedaes
