El músicu y gaiteru asturianu Daniel Meré va actuar na Casa de Cultura de Lluanco esti vienres 23 de xineru a les 19:00 hores, nun conciertu que propón una mirada renovadora sobre la gaita asturiana, apostando pola fusión ente tradición, electrónica y música popular contemporánea. L’actu, pensáu pa tolos públicos, ufierta una esperiencia sonora distinta, na que’l folclor dialoga colos llinguaxes musicales del presente.
La propuesta artística de Meré parte d’una idea clara: demostrar que la gaita ye un instrumentu vivu, capaz d’adaptase a nuevos contestos y de conectase con oyentes de distintes edaes. Pa ello, el gaiteru reinterpreta cantares d’actualidá, llevándoles a un terrén nuevu gracies a la combinación del soníu tradicional. El propiu gaiteru comenta que van sonar «les versiones completes de lo que xubo a redes, pero tamién otros que son bastante populares y que nun xubo». Nel repertoriu tienen cabida versiones de cantares bien conocíos del pop y la música urbana, asina como referencies del panorama estatal ya internacional, que s’afayen a la personalidá sonora del instrumentu asturianu.
Más allá del componente musical, l’espectáculu tamién tien un enfoque divulgativu, apostando por normalizar la presencia de la gaita en escenarios non convencionales y en formatos más cercanos a los conciertos actuales, «tratando d’averar la gaita a un mayor públicu». La electrónica, l’usu del ritmu y la puesta en escena ayuden a crear un espaciu onde la música tradicional dexa de vese como algo estáticu pa convertise nuna ferramienta creativa y abierta. Nun van faltar tampoco temes tradicionales y amás, siendo’l conciertu en Gozón, l’artista añade que va tocar dalguna habanera seguro.
La propuesta del gaiteru de Bañugues ye la primer vez que s’atopa nel circuitu Cultura en Rede, gracies al trabayu de Fabriok y a Meré prestaría-y «qu’esto seya un primer averamientu a los conciertos y, nel futuru, poder facelos con versiones de temes tradicionales o composiciones propies míes.
Suscríbite a les nuestres novedaes
