El Semando Fest sigue afondando na so apuesta pola música tradicional y la creación d’espacios de convivencia alredor d’ella. Na so cuarta edición, el festival va celebrar una folk session en collaboración cola asociación cultural Caricós, nuna cita que va suponer un pasu más na evolución d’esti formatu dientro del eventu.
Esta va ser la segunda vegada que’l Semando Fest organiza una folk session, depués de la bona acoyida de la esperiencia anterior. Sicasí, ye la primer vegada que se fai en collaboración con Caricós, una asociación formada por xente mozo que vien trabayando pola dinamización y tresmisión de la música tradicional asturiana dende una perspectiva abierta y participativa.
La folk session ta pensada como un espaciu compartíu, onde músicos y músiques puedan xuntase pa interpretar pieces del repertoriu tradicional, favoreciendo l’intercambiu y la improvisación, y poniendo en valor el calter colectivu del folk.
La cita va tener llugar el día 6 de febreru, a partir de les 22 hores, nel Chigre Pub L’Esperteyu d’Uviéu, dientro de la programación previa del IV Semando Fest, que vuelve apostar por formatos abiertos y participativos. Con esta iniciativa, el festival reafirma’l so compromisu cola música n’asturianu y col relevo xeneracional, incorporando propuestes que conecten tradición y presente y reforzando les redes ente colectivos y proyectos culturales del país.
Al día siguiente, el 7 de febreru, va celebrase la xornada principal del IV Semando Fest, con una programación de conciertos que va xuntar a PVXARRA, Rellume, Entós y Fruela 757 y Lucía Rojo. El festival va desarrollase na sala Lata de Zinc d’Uviéu, con actuaciones repartíes a lo llargo de la nueche y horarios escalonaos, completando un fin de selmana dedicáu a la música fecha n’asturianu por xente mozo. Les entraes pal festival pueden mercase entá calcando equí.
Suscríbite a les nuestres novedaes
