Los Premios de l’Academia de la Música d’España tán acabante d’anunciar les nominaciones pa esti añu y, ente elles, alcuéntrase la de la cantautora asturiana Marisa Valle Roso. La llangreana ta nominada a Mejor álbum folclórico gracies al so discu Cenicientes, una estaya na que ye finalista xunto a otros artistes que trabayen con otres músiques de raigañu peninsulares: El Nido, Germán Díaz y Benxamín Otero, La María y La Tania.
D’ente les 19 estayes y 95 finalistes, namás hai otra nominación pa una artista d’Asturies: Belinda, dientro de la Mejor grabación música infantil. Tampoco hai nominaciones na estaya Mejor canción en galego asturianu, una categoría na que la música n’asturianu queda diluyida dientro de la gallega, escena de la que son toles nominaciones d’esti añu. Precisamente, esta situación d’excepcionalidá foi retrucada pola Conseyera de Cultura, Política Llingüística y Deporte, Vanessa Gutiérrez, ensin haber novedaes entá de respuesta per parte de l’Academia de la Música.
Cenicientes ye’l trabayu más completu de Marisa Valle Roso. Ta formáu por diez cantares qu’entemecen el folk col pop y los instrumentos electrónicos y nel que-y canta al feminismu, a la llucha pola xusticia social, a la reivindicación de la memoria colectiva asturiana y de la so identidá. Tamién afonda no más personal, dedicando’l so espaciu a la salú mental, el gran problema de la sociedá del sieglu XXI. El conciertu d’Uviéu enmárcase dientro de la xira d’esti discu que ta llevando a la cantautora per ciudaes de tol Estáu español.
D’otra banda, Belinda ta nominada na Mejor grabación música infantil col discu Las aventuras de Abel. Belinda ye una violinista de Cangas de Narcea afincada n’Ibiza que tien venceyu tamién cola música’l país. Collaboró en varios discos del grupu Muyeres y d’otros artistes como Xuacu Amieva, Diego Pangua, Chus Pedro y Celtia, amás ye fía de Maribel López Parrondo, dinamizadora de la música tradicional nel occidente’l país, sobre manera del pandeiru como instrumentu.
Suscríbite a les nuestres novedaes
