Dixebra publiquen el making of de la grabación de ‘Ente la niebla’
Tres llanzar la selmana pasada en plataformes dixitales el single “Ente la niebla“, primer adelantu del discu nuevu de Dixebra que lleva’l mesmu títulu, la mítica banda de rock astur publica’l making of de la grabación del discu. Nél, pue vese parte de la grabación que ficieron nos Tutu Estudios, inclúi declaraciones de Xune Elipe falando sobre’l trabayu y amuesa la collaboración de Lluci G. Palomares y Bárbara González-Quevedo nel cantar “Como la mar”. Tamién suenen fragmentos del tema yá publicáu “Ente la niebla” y de “Mr. Marshall”, una de les pieces ska del trabayu.
‘Ente la niebla’ ye la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares . Nesti llibru-CD collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.
El trabayu yá pue acutase en musicasturiana.com pa que quien lu merque lu reciba na so dirección el mesmu día del llanzamientu. Amás, mentanto dure la preventa hai merchandising de Dixebra a preciu rebaxáu y tolos pidíos van llevar de regalu una postal con testu manuscritu y firmada colectivamente pol grupu.
