N’abril va haber más de venti conciertos de música n’asturianu
Aporta abril y con esti mes lleguen los primeros festivales, folixes, espiches y muncha música en directo. N’axenda de musicasturiana.com yá hai 21 eventos añadíos ente los que s’inclúin presentaciones de discos, conciertos especiales por aniversarios, charres, estrenos de xires y festivales nos que la música en llingua asturiana tien protagonismu.
La presentación en La Llocura de Mieres del llibru de Xune Elipe dedicáu a la historia de la música asturiana, ‘Hai una llinia trazada‘, y la Espircha de La Semiente cola actuación de 6 Riales, abren esti vienres la programación del mes. Pal sábadu 2 la Banda Gaites Llariegu va dar un conciertu perespecial pol so 25 aniversariu -que van grabar pa editar un CD y DVD-, y Ún de Grao actúa en La Traviesa de L’Infiestu, amás va facer el 16 y 17 d’abril doblete nel Meidinerz Jazz Club de Xixón.
Pal fin de selmana qu’entra Llangréu acueye’l Festival Internacional de Cerveza Artesano de Llangréu (FICAL) nel que van actuar el vienres 8 Ilustres Patilludos, Los Berrones y La Tarrancha; mentes qu’en Mieres la Folixa na Primavera va tener una programación enllena de música, baille y cultura asturiana. Les actuaciones de La Bonturné -vienres 8-, Fruela 757 -sábadu 9-, Baxel y Calea -domingu 10-, dan forma a los conciertos d’esti eventu nel que tamién va haber Tarde en Danza, cantares de chigre, tonada y actuaciones d’agrupaciones folclóriques.
El CSA L’Apiaderu d’El Remediu (Nava) sigue puxando pola música asturiana y el 9 d’abril Alicia Álvarez va dar un conciertu pa tola familia tocando los cantares del so trabayu últimu ‘Kikirikikí‘. Esi día, tamién va arrancar nel Teatru Riera de Villaviciosa la xira de Calea, el nuevu proyectu folk formáu por Silvia Quesada, Leticia Baselgas y Rubén Bada que va pisar l’escenariu -aparte d’en Mieres- del Auditoriu de Tapia el 30 d’abril.
Ente les presentaciones de discos tán les de ‘Humanes‘ de Muyeres, el 12 d’abril -con entraes escosaes- nel ciclu Encaja2 del Teatru Xovellanos de Xixón; ‘Sirio‘ de Fontoria’l 16 d’abril na Casa la Cultura de L’Infiestu y ‘El Cantar del Simpatías’ de Baxel el 22 d’abril nel Auditoriu de La Pola (Siero). Les actuaciones de Los Gascones pal 16 d’abril en Ribeseya y de Silvia Quesada pal 23 nel Espaciu de Creación Mozo de Salas, zarren la programación confirmada pa esti mes. Dende musicasturiana.com va facese un siguimientu d’ello ampliando información con noticies y calteniendo l’axenda actualizada.
